Green tel loin Warriors chak

Hrem vangin Draymond Green inkhel thei lo mah se Golden State Warriors an chak tho, an thiampuipa Stephen Curry-a hoin nimin zinga an khingpui Brooklyn Nets chu 124-120 in an hneh.

Player thiam danglam bik Curry hian point 37 a nei a, quarter hnuhnung ber hun pawimawh laiah a che ṭha hle. Ani bakah hian point 24 neitu Klay Thompson a che ṭha leh bawk - GSW player panga ngawtin point 10 an neih tlin avangin an khel ṭha rual tih a chiang.

Warriors hian a bul an ṭan fuh a, chawlhlawk lai pawhin point 18 ngawtin an sang fal hman. Mahse, Nets lamin na takin an bei let a, point hnih chauha inthlauh lai pawh an nei hman hial a, a chak tur zawk sawi thiam pawh a harsa hman.

Amaherawhchu, hun tawp hma minute sarih vel chauh awm tawhah Curry a inlan, a zawnin point 12 ngawt a nei! Basket nei tura a shot a hlawhtling thei em em a, hun pawimawh laiah player danglam bik a nihna lantirin a team a chakpui.