Coach thar hoin Bengaluru chak nghal

Bengaluru chuan an coach thar Gerard Zaragoza kaihhruaina hnuaia an match hmasa berah hnehna an chang nghal a, Inrinni zan khan an mikhual Jamshedpur FC chu 1-0 in an hneh - minute 44-naah Javi Hernandez chuan penalty aṭangin inkhela goal awmchhun hi a khung.

Kum 41 mi Zaragoza hi Spanish coach niin, 2018-19 season-a Bengaluru-in ISL nomawi an chawi khan assistant coach a ni a, hemi hnuah hian UAE Pro League club Shabab Al-Ahli, Super League Greece club Panserraikos FC leh UAE Pro League club Khor Fakkan Club te a enkawl tawh.

Indian football-ah a lo kir leh ta a, a match hmasa berah Bengaluru a chakpui nghal - JFC tan defender PC Laldinpuia chuan inkhel bul ṭanin, Mizo inlan awmchhun a ni.

Inrinni zan ISL inkhel dangah Mumbai City leh East Bengal te 0-0 in an inhnehtawk. Mualneitu Mumbai tan Lalengmawia Ralte (Apuia) chuan chance nei mah se goal-ah a chantir thei lo a, bench aṭanga luhtir Lallianzuala Chhangtein danglamna a thlen thei bik lo - East Bengal tan Lalchungnunga chuan dan pangngaiin inkhel bul a ṭan.

Zirtawpni zan khan ISL match khat awmin Mohun Bagan chuan 3-1 in NorthEast United an hneh. Mualneitu Highlander tan Phalguni Singh chuan minute lina lekah goal hmahruai khung mah se, Kolkata club-in Deepak Tangri, Jason Cummings leh Subhasish Bose hmangin an chhanglet a, 3-1 in hnehna an chang.

Highlander defender Tondonba Singh chu minute 54-naah a yellow card pahnihna avangin hnawhchhuah a ni a, Guwahati club hi hetihlai hian 2-1 a hnufual tawhin, a tlem zawk ni chunga thawhchhuah an tan a harsa tawh - Bagan tan Lalrinliana Hnamte (Terina) chu bench aṭanga luhtir a ni.