Lawngtlai Open a zo

Lawngtlai District Badminton Association (LDBA) leh Mizoram Badminton Association te ṭangkawpin an buatsaih, Lawngtlai Open MBA Senior Ranking Badminton Tournament 2023 chu Zirtawpni khan neih zawh a ni a, he inelnaah hian player 140 ngawt inlanin, match 96 lai khelh a ni.

Lai Cultural Centre cum Auditorium, Lawngtlai 3-ah inelna hi neih niin, Chaltlang Badminton Club aṭangin category ngaihven hlawh leh pawisa fai tamna ber Men's singles-ah C. Lalrohlua chu a champion a, Lalnuntluanga Hauhnar, New Serchhip BC chuan category pahnihah final lutin, Men's doubles category-ah a champion a, Men's singles-ah pahnihna a ni bawk.

December 12-a neih ṭan inelnaah hian hmeichhe lamah, Chaltlang BC player pahnihin category pahnihah nomawi an chawi - Liansangpuii chu women's singles leh women's doubles category-ah a champion kawp a, Zorinkimi chuan Women's doubles leh Mixed doubles ah champion nomawi a hawn ve ve bawk.