Napoli tan Osimhen leh Kvaratskhelia

Victor Osimhen leh Khvicha Kvaratskhelia te goal hmangin Napoli chuan Cagliari 2-1 in an hneh a, point thum hlu tak hlawh chhuakin season bul an ṭan fuh tawk lohna chu an siam ṭha mek zel.

Serie A champion lai Napoli hian tun season chu Diego Armando Maradona Stadium an hmang ṭha tawk lo, anmahni khelmualah hian an league match hnuhnung paliah point khat chiah an hmu, an tan Cagliari hneh hi chanchin ṭha a ni.

Italian football inelna sang ber inkhel dangah Juventus erawh an chak zo lo. Old Lady tana Federico Chiesa penalty khung chu second half tirah Genoa tan Albert Guomundsson chuan a sut a, 1-1 a inhnehtawkin point khat an insem.

Juve hian point an hloh avangin hmahruaitu nih lailawk theihna an neih chu an bawhpelh a, match khata khel tam zawk chungin a chung bera awm Inter Milan chu point khatin an phak lo mek a ni.

Old Lady manager Massimiliano Allegri chuan, "Genoa hmachhawn hi chu a awlsam lo ṭhin, ṭha taka kan khelh avangin point kan hmu niah ka ngai," tiin a sawi a, hmahruaitu an ni lo erawh a ui thu a sawi bawk.