Barcelona tan Lionel Messi bawk!

Team talbuai Barcelona-in hnehna an chang ve leh ta a, an mikhual Levante chu Lionel Messi goal hmangin 1-0 in an hneh. 

Barcelona-in hnehna an chan ve leh tak avangin table-ah pariatnaah an chho a, hmahruaitu Real Sociedad an phak lohna chu point kua a ni - match khatin an khel tlem thung. 

Real Sociedad hian Pathianni zan inkhel dangah Eibar chu 1-1 in an inhnehtawkpui a, point hniha Real Madrid ngam lotu Atletico Madrid tlan pelh theihna hun remchang an neih chu an bawhpelh. 

Sociedad tan hian Ander Barrenetxea chuan goal hmahruai khung mah se Eibar-in Sergi Enrich hmangin an chhanglet - Sociedad hian point 26 an nei mek a, match hniha khel tlem zawk Atletico nen an point hmuh zat a inang. 

Barcelona-in tun season-ah beisei an phak lo takzet. Kar hmasa La Liga inkhelah rin loh takin Cadiz chu 2-1 in an ngam lo a, Champions League-ah Juventus chu 3-0 in an ngam loh zui - an tlawmna hmun hi Nou Camp a ni. 

Levante an mikhual hmain Catalan club hian league match 10-ah vawi li chiah chak an nei thei a, vawi hnih an khingpui an inhnehtawkpui a, vawi li an tlawm thung. 

Pathianni zanah pawh Barca-in goal hmu turin an nghah rei a ngai a, hun tawp nan minute 14 chiah a awm tawh tihah Messi chuan goal a rawn khung hram. 

Argentine forward goal khung hi Frenkie de Jong-a siamsak a ni a, Levante goalkeeper che ṭha tak Aitor Fernandez-a'n tih theih a nei lo - goal dang a lut lo a, 1-0 in Barca an chak. 

Catalan club-in goal khat chauh khung mah se inkhel pumpui thlir erawhin chak an phu a, Spanish keeper Aitor chet ṭhat zan ni lo se goal tam zawk khung thei an ni. 

Barca tan hian Martin Braithwaite, Clement Lenglet, Jordi Alba leh Antoine Griezmann-te chuan goal khungna remchang an nei vek a, mahse Aitor a chet ṭhat zan an nang hlauh a, an vanduai. 

Levante tan Real Madrid B team winger hlui Jorge de Frutos leh 'Son' tia hriat lar Hidalgo Gómez-ten hun ṭha nei mah se goal an khung thei bik lo a, chak phu zawk Barca-in hnehna an chang. 

Nou Camp-a inkhelah Barcelona hian 63% ball an chang a, vawi 24 shot an nei a, heng zinga 13 zet chu target-ah an shot thei a ni. 

Messi-a'n nipui transfer-ah chhuah a dil a, Barca nen boruak an neih hat hnuah Argentine forward hian ngai a awh lo nia sawi a ni - mahse, a inkhel en ṭhin chuan season dang angin goal khung uar ta lo deuh mah se Messi hian a thiam a la theihnghilh lo tih an hria ang. 

Pathianni zanah pawh a ṭhianten goal an khung theih loh laiin Messi-a'n goal a khung a, tun season La Liga-ah goal nga a khung leh ta der - Spanish top flight football-a top scorer ni mek Mikel Oyarzabal chuan goal sarih a khung tawh. 

Messi hian tun season inelna hrang hrangah match 15 khelin goal riat a khung tawh a, assist vawi li a nei - goal 12 zet chu a thawk chhuak leh tawh tho tihna a ni a, world class striker ṭhenkhat season duhawm nen a inang reng.

Barcelona hian January-ah President thar an thlang dawn a, candidate ṭhenkhatin club-a lungawi lo Messi chhuahtir an hnial loh thu sawi mah se Messi-a'n Catalan club a mamawhna aiin Barca-in Messi an mamawhna hi a la sang zawk reng niin a lang.