Zote Toyota MPL10 Semifinal : Zanin dar 8:00-ah Mizoram Police Vs Chhinga Veng

Zote Toyota MPL10 semifinal hnuhnung zawk chu zanin dar 8:00 hian Mizoram Police leh Chhinga Veng ten RG Stadium-ah an khel dawn. Police hi MPL-ah an la champion ngai lo a, an tan kumin hi hun ṭha a ni. Mahse, Lalsangzuala Hmar enkawl Chhingcows hian Police daltu nih ngei an tum thung.

Team ṭha Vs Team ṭha

Mizoram team-a player thawh hnem hi team ṭha teh nan a hman theih a, Mizoram Police leh Chhinga Veng te hian player 22 awmna aṭangin player 14 an thawh avangin team ṭha an ni tih a chiang. Chutihrualin kumin Santosh Trophy-a Mizoram team kha team pali Police, Chhingcows, Chanmari FC leh Chawnpui FC aṭanga thlan an ni a, semifinal an lut vek.

Chhingcows hian coach Sanga Hmar bakah player pakua an thawh a, Police hian player panga an thawh thung. Police hi thawh tlem angin lang mah se Malsawmfela, Lalfakzuala leh Lalbiakhlua tan Mizoram team-ah hmun a awm. Sawmfela hian ṭhangthar a kian a, Biaktea hi chhungkaw thil niin Fakzuala hi inhliam vang a ni thung.

Hei bakah hian Police aṭanga Mizoram aiawha kal goalkeeper F Lalmuanawma, defender Lalrinzuala Khiangte leh Lalhmunamwia (Ahmuntea), midfielder Lalbiakthanga Hmar leh R. Malsawmtluanga te hi rinrawl vek a ni. Chhingcows-in player thawh hnem zawk mah se Police player-ten minute an ngah zawk.

A fiah ta e

Mizoram team tur thlanchhuah a nih khan table-a panganaa awm Chhinga Vengin player pakua ngawt an thawh a, mak tih a hlawh hle. Chhingcows hian match ruk aṭangin point riat an hmu a, pangana an ni pha chauh.

I Day Football champion an nih avangin an ṭha tih chu a hriat theih a, MPL10 phase 1 an chet chhiat chhan erawh khelmual pawn buaina vanga ni a, Police nen inkhel loa point an hloh tawpte chu an tuar hle.

Chhinga Vengin sum lama harsatna avangin an player biak fel sa thlengin an chân a, an result-ah nghawng a nei bawk. MPL10 Phase 2 ṭan dawnah pawh training lawk thei lo mah se Mizoram team-ah player pakuain training ṭha an dawng a, Phase 2-ah chuan point hmu hnem ber an ni.

Chhingcows hian phase 2 aṭang ringawtin point 16 an hmu a, anmahni hnaih bertu chu zanina an khingpui tur leh point 12 hmutu Police an ni. Phase 2-a an result thlirin Chhinga Vengin player an thawh hnem kha a mak ta lo a, mahse, final round-ah an thawh hnem zel ang em, tih chu zanina an inkhel result hian a hril thui khawp ang.

Midfield battle

Police hian 4-4-1-1 formation an hmang ber a, Malsawmfela chu hmatawngah dahin player thawkrim F. Lallawmkima chu number 10 hna an chelh tir ṭhin. Midfield laiah box to box midfielder ṭha H. Lalbiakthanga leh killer pass pe thei R. Malsawmtluanga te an dah.

Chhinga Veng khelh dan a danglam tam lo a, PC Lallawmkima hmatawnga an dah hnuah MS Dawngliana'n no. 10 hna a chelh. Midfield-ah Santosh Trophy player pahnih tho Zonunmawia leh Johny Lalremruata te an awm a, Serchhip tlangval Johny hi a dam chian loh avangin Republic Veng tlangval Lalnunzira a inlan thei bawk.

BT-a hi MPL hrechiang ber zinga mi a ni a; Police a luh hmain FC Kulikawn, Luangmual FC leh Aizawl FC tan a khel tawh. A kawppui MS-a hian sulhnu a nei ṭha lehzual a, Chanmari FC leh Chhinga Veng FC a champion pui ṭumin best player-ah thlan a ni ve ve. Chutihrualin talent nei ṭha pahnih hi an kum a upa ve tawh a, Chhinga Veng laka an chungnung theih nan an tawnhriat hman ṭangkai an tum ang.

Chhingcows midfielder Johny leh Zirtea te erawh bul la ṭan ve chauh an ni a, AIFF Elite Academy chhuak Zonuna'n football-ah tawnhriat nei ṭha mah se MPL-ah erawh a vawi khatna a ni a; cancer natnain tibuai lo se chuan ISL-ah a inlan tawh zawk hial ang. Team pahnih midfieder te an inhrechiang a, a hmuhnawm khawp ang.

Tlarhnung lam hi...

Mizoram Police goalkeeper F. Lalmuanawma hi tun dinhmuna Mizoram no. 1 a ni a, MPL9 best goalkeeper a ni bawk. Chhingcows goalkeeper RS Lallawmzuala'n Muanawma khum a duh a nih chuan zanin hi hun ṭha a ni tih a hriat a ngai dawn a, knockout a nih tawh avangin penalty a thleng thei tih hriat a ṭha bawk.

Police tlarhnungah Lalhmunmawia (Ahmuntea) leh B. Zoramthanga te an inkawp a rinawm a, Ahmuntea hi inliam vangin match li a awl - match tawp berah khan halftime-ah a rawn lut. Hualngohmun defender Ahmuntea dam hi Police tan chanchin ṭha a ni a, Lalrinzuala Khiangte leh Lalruatpuia te nen an theihna zawng zawng an chhuah leh ang.

Chhinga Vengin tlarhnungah FC Lalhmunmawia leh A. Vanlalremruata te an hmang a, mual sira awm tur erawh rin thiam a har deuh. C. Lalhunruata leh Lalruatdika (Teka) te an awm a nih pawhin a mak lo ang.

Goal mawlh hi...

A pawimawh ber chu goal a ni a, mak ang reng tak chu Police tana goal khungtu zingah MPL2 leh MPL3-a top scorer Lalbiakhlua (Biaktea) a la tel lo. Captain Lalfakzuala pawhin goal hnih chauh a la khung a, mahse senior player-te hi a hunah tak an rah leh ṭhin.

Chhinga Vengin MS Dawngliana an kawl a, Police-in Dawngtea hi an veng uluk a nih chuan PC Lallawmkima, Lallawmsanga, Isac Zomuanpuia leh Isaak Malsawmkima te an rawn penchhuah a ngai ang. Isaak hi I Day Football-ah che ṭha mah se MPL10-ah a hriam tawk lo a, khelhna hmun a chang a nih chuan zanin hi a hming chher theihna remchang a ni.