Dawngtea a top scorer thei ang em?

Chhinga Veng captain MS Dawngliana hian tun season MPL10-ah goal sarih a khung tawh a, top scorer ni turin goal hnih a la mamawh. Chhingcows-in zanina hnehna an chang a nih chuan goal hnih khung nan minute 180 a nei thei dawn tihna a ni a, chutihrualin Police hi an hneh zo lo a nih chuan top scorer ni turin zaninah goal hnih a khung ngei a ngai thung.

Tun dinhmuna MPL10-a goal khung tam ber chu Aizawl FC forward Lalrinzuala a ni a, Serchhip tlangval hian goal riat a khung. AFC-in I League an khelh avangin Rinzuala hi match ngaah a khel thei lo a, goal riat khung nan match kua a mamawh tihna a ni. Minute 782 aṭangin goal kua hi a khung a, a score rate pawh a chhe lo.

Dawngtea erawh season bul a ṭan ṭha tawk lo a; red card hmuh vangin match hnih hrem a ni a, a bak match-ah chuan club-in a mamawh bawk nen bul a ṭan vek bakah an thlak lo. Bawngkawn forward hian round 10-a Electric Veng an sawp ṭumin goal li ngawt a khung a, semifinal-a Chanmari an hneh ṭumin goal awmchhun a rawn khung leh bawk.

Chhinga Veng hian Mizoram forward pahnih PC Lallawmkima leh Lallawmsanga te kawl mah se an club goal khung dan thlirin Dawngtea chungah an innghat nasa tih a chiang hle. Zanin hian Chhingcows-in final lut turin Dawngtea an mamawh a, Dawngtea'n final thlen nan bakah top scorer a nih theih nan goal a mamawh ve bawk.

Chhingcows hian MPL10-ah goal 18 an khung a, heng zingah hian an khingpuite khungsak goal khat a tel. A bak goal 17 hi player pakuain an khung a ni a, MPL1 top scorer leh MPL7 best forward Dawngtea tih loh chu goal khung thei bik tia sawi tur an awm lo.