BS-a Vs Sanga

Mizoram Police leh Chhinga Veng inkhel tur hi coach inbeihna tiin a sawi theih bawk. Police enkawltu BS-a Colney hian player leh coach ni chungin an veng Armed Veng chu vawi engemaw zat a champion pui tawh a, hei bakah hian Mizoram Police chu All India Police Meet-ah a champion pui. Police Meet-a nomawi chawi hi thil namai a ni lo, tun hmaa Police ropui lai zawng zawng pawh khan an chawi thei lo - BS-a hnuaiah chiah an la champion.

Chutihrualin Chhingcows hi club pathum MPL nomawi chawipui tawhtu Lalsangzuala Hmar-in a enkawl a, tualchhung football-ah nomawi chawi theih zawng zawng a chawi tawh tia sawi theih a ni.

Coach pahnih buk a rit a, Sanga leh BS-a Colney te inkhelh dawn hi chuan MPL Awards 2017 kha a thar leh ṭhin. MPL club association buatsaih MPL Awards 2017-ah Police coach BS-a Colney chu best coach of the year-ah thlan a ni.

MPL6-ah Police chu table mawngphahah an awm a, BS-a Colney-in phase 2 aṭanga rawn enkawl ṭanin season a tawp meuh chuan pathumna hialah an invawrh chho. A record hi a ropui a, hei hi MPL Awards 2017-a best coach of the year chawimawina a dawnna chhan a ni.

Chutihrualin hemi season hian Sanga hnuaiah Chhinga Vengin nomawi chawi theih zawng zawng MFA Super Cup, I Day Football leh MPL an chawi vek. MPL6 league round-ah Chhinga Veng hi pakhatna an nih bawk avangin Sanga hian chawimawina an sem dan chu pawm har a ti a, tun thlengin coach pahnih enkawl team an inkhelh tawh chuan inkhel a nung ziah.