An intluktawk

Mizoram Police leh Chhinga Veng te hi tun season-ah ṭum hnih inhmachhawn tawh tur an ni a, MPL10 round 1-ah Chhingcows registration fel loh avangin inkhel miah loin Lalsangzuala Hmar hote 3-0 a chak loh tir an ni.

MPL ṭan hma hian I Day Football group stage-ah an inkhel a, goal kua zet luhna inkhel kha tun season-a inkhel hmuhnawmte zinga mi a ni. Chhingcows leh Police te hian goal an inkhung chhawk zak zak a, a tawpah MS Dawngliana'n injury time-ah chakna goal a khung.

Hemi ṭuma player hmuhnawm bik Suanngaihmuana erawh khup hliam vangin MPL-ah a theihna a lantir thei lo a, zanin pawh a inlan thei lo ang. An intawn hnuhnun ber chu December 8, Zirtawpni mai kha a ni.

Chhinga Veng hian semifinal lut turin chak an mamawh a, Police tan draw a tawk thung. Inkhel nung ṭha takah goal a lut lo a, Chhingcows-in goal chance an ngah zawk. Chutihrualin Police pawh hi chak thei dinhmunah an ding. Tun season-a an inkhelh tawhna thlirin team pahnih hi an intluk tawk hle.