Anfield-ah goal a lut lo - Liverpool aia lawm United

Liverpool-in season hmasa lawka Anfield ngeia 7-0 a an sawp hnu Manchester United an mikhual a, goal an khung thei lo. Team pahnih hi 0-0 in an inṭhen a, a tawpa lawm zawk chu Manchester United an ni.

Erik ten Hag-a enkawl team hi tun hnaiah an talbuai a, Old Trafford-ah team tenau Bournemouth chu 3-0 ngawta an ngam loh hnuin, Champions League-a beiseina chhetê an neih chu Bayern Munich-in an hmeh mihsak bawk.

Liverpool erawh Premier League hmahruaitu an ni a, Jurgen Klopp-a ṭawngkam takin 'Liverpool 2.0' tiin an indinthar mek. Mahse, Anfield-ah Liverpool-in goal an khung lo miau a, table-ah pahnihnaah an tla thla.

A har a ni

Hliam vanga talbuai United boss Ten Hag-a'n Liverpool goal nawr aiin an lama lut tur venhim chu thupui berah a nei zawk a, 4-2-3-1 hmanga a player-te remin, counter attack hmanga Liverpool hrem chu a tum ber a ni.

Reds-in ṭum danga an tih ṭhin angin na takin an nawr thung a, mahse, awmze neiin United tlarhnung an chhaih mangang thei meuh lo a, club chhuanvawr Mohamed Salah meuh pawhin a thiam thil a 'show' hleithei meuh lo.

Jurgen Klopp-a naute hian 68% zet ball changin, vawi 34 zet chu 'shot' an nei a, heng zinga pariat chiah hi goal zawnah a kal - tun season-a an hmingthanpui em em, hun tawp dawna goal khung meuh pawh tun ṭum chu an tithei lo a, United tlarhnung an khel ṭha hle.

Beisei phak lo

Liverpool-in a vawi khat nan stand thar Anfield Road Stand an hmang a, mipui 57,158 zet an pungkhawm - February 1963-a FA Cup-a Burnley nen an inkhelh ṭuma fans pungkhawm hnua Anfield-a inkhel en an tam ber ṭum a ni a, Liverpool fan-ten an chak lai hmuh an duh.

Mahse, Virgil van Dijk-a chance neih ṭhat chu tun hnaia mualpho, United keeper Andre Onana chuan ṭha zetin a dansak a, Salah ke hmui zan a ni lo a, Trent Alexander-Arnold-a'n a chance neih a chhawr lo a, ven loha a awm chungin Cody Gakpo-a'n a hun ṭha neih a chhawr lo bawk.

United lamah league-a goal la khung lo Rasmus Hojlund chuan hming chherna hun duhawm nei mah se, a hmaah Alisson ber kher a din avangin goal a khung thei lo a, a tawpah team pahnihin point-a lungawi an zir - hun pek belhah United defender Diogo Dalot chu referee laka a lungawi lohna a lantir nasat avangin hnawhchhuah a ni a, Reds tan chhawrna hun a awm tawh lo.

-----------------

Lawmna tur tam tak ka hmu a, ka lawm lohna chu result a ni deuh mai e. Goal khung tur khawpin chance kan nei a, kha aia ṭha zawka chance pawh insiam thei kan ni. United laka hetiang taka kan khelh ṭhat hi ka hre ngai lo a, 7-0 a kan chak ṭum ai pawh khan kan khel ṭha hial ang chu.
Kan khelh danah kha chuan lehlam pawl tan nawr let kan harsa a, mahse, United kha an inveng ṭha em a ni. Goal khung ila, risk an lak a ngaih avangin tlemin a inhawng deuh ang. Mahse, engmah a inthlak danglam thei lo. United khan an theihna zawng zawng an hlan a, a tawpah chuan 0-0 a ni ta a ni.
- Jurgen Klopp,
Liverpool manager

Thil tam tak a thleng a, kan khel ṭhain ka hria. Kan ruahman angin kan khel thei a, ka player-te thawhhona leh beih hram hramna kha a ṭha takzet. Ka sawisel duh awm chhun chu ball kan chanin kan tifuh tawk lo ṭhin kha a ni a, kan chance neih zinga pakhat tal kha khung ila, kan chak zawk hial ang chu.
Liverpool hi team ṭha tak an ni a, an goal nawr pawh a na hle. Hetiang ang team lakah chuan tlarhnung kan ngheh tlat a pawimawh a, kan ti ṭha viau a ni. Nikuma Anfield-a kan intawn hma khan vawi hnih kan hneh tih hre chungin kan khel a, mahse, a hnuah min sawp hrep avangin phuba lak chu kan chak ngei alawm. Squad chhah ṭha tak kan nei a, tun season-ah pawh beisei tur chu kan nei zel ang.
- Erik ten Hag,
Manchester United manage