Thlasik boruak chentu Arsenal

Khaw vawh vanglai kan tawng chho mek - Premier League table chung berah Arsenal an awm leh ta vang mai; Krismas laiin hmahruaitu an ni ngei dawn em, tih erawh a la chiang lo, an elpui Liverpool nen December 23 zanah an intawng dawn.

Gunners hian Pathianni zan khan Gabriel Jesus leh Kai Havertz te goal hmangin Brighton & Hove Albion chu 2-0 in an hneh a, match 17 aṭanga point 39 hmuin hma an hruai - Reds lakah point khatin an sang zawk, match khat lekah a la danglam thei tihna a ni.

Inkhel hnuhnung zawkah Manchester United leh Liverpool te chu 0-0 in an inhnehtawk, an elpui point hloh karah Arsenal an sang a, champion lai Manchester City an chet fuh loh bawk avangin an tan kartawp hun nuam a ni ngei ang.

Aston Villa an che fuh zel thung. Unai Emery naute hian goal an phurh hmasak hnuah Alex Moreno hmanga sutin Ollie Watkins chuan chakna goal a khung bawk a, an mikhualna ramah Brentford 2-1 a hnehin pathumna an ni chhunzawm.

Laipui a puak

An league match hnuhnung berah Aston Villa an hneh lo a, hemi ṭum hian Mikel Arteta chu hrem niin mual sir aṭangin a naute a ho thei lo - Champions League lamah player indahṭha chungin PSV Eindhoven nen an inhnehtawk zui bawk.

Emirates Stadium a ni a, chak ngei ngei tumin Brighton an mikhual. A tir aṭanga ball chang tam zawkin inkhel pawh an thunun hneh hle, mahse goalkeeper Bart Verbruggen a dingnghet tlat.

Bukayo Saka, Martin Odegaard, Gabriel leh Gabriel Martinelli te chuan chawlhlawk hmain remchang an nei a, mahse an khung thei lo vek - an vanduai ṭum a thleng leh mai ang tih an hlau hmanin a rinawm.

Mahse, second half-ah Jesus chuan corner aṭanga ball kal chu a channa tur hmun dik takah a lo chang fuh a, vengtu nei loin hnai takah a tauh lut a, inkhel boruak a danglam chhunzawm nghal daih.

Bench aṭanga Leandro Trossard leh Eddie Nketiah te an luh hnuah an goal nawr dan pawh a danglam hret a, hemi chhawrtu Havertz chuan minute 87-naah chak nemnghehna goal khungin point thum an hlawh chhuak.

Hnehna chu

Brighton hian Emirates Stadium hi an luhchhuah thei riau ṭhin, league match khel tura an lenluh hnuhnung pahnihah an chak, tun ṭumah pawh hian hun rei tak chhung inveng theiin counter attack aṭangin an bei let ṭhin.

Mahse, ni dang nen a inang lo - Arsenal khan goal khung tumin vawi 26 ngawt shot an nei a, goal hnih chauh an chhuah kha Seagulls an vannei - captain Odegaard leh Saka te vanneih zan ni se Gunners khan goal tam zawk an khung a rinawm.

Arsenal manager Arteta chuan, "Brighton hi team inkhairual leh khelh dan phung nghet tak nei an ni a, anni ang team ṭha laka kan khelh dan kha a lawmawm, dawhthei takin kan hun a thlen hun kan nghak chhuak," a ti.

Roberto de Zerbi enkawl Brighton hian an player neih ṭhat an hum thei ṭhin lo a, an neih sa zingah hliam an awm bakah squad pan tak nena European football an khelh avangin an tan thil a awlsam lo.

Seagulls manager De Zerbi chuan, "Second half-ah khan Pascal Gross hmangin remchang ṭha kan nei a, khung ni ila chuan point khat kan hmuh theih a rinawm, mahse a pumpuiah chuan Arsenal khan chak an phu zawk," a ti.