Odisha tan Isak-a a vul

Pathianni zan Indian Super League inkhelah Odisha chuan 3-0 in Hyderabad FC an sawp a, Odisha forward Isak Vanlalruatfela chu player of the match atan thlan a ni.

Odisha tan Roy Krishna chuan goal hnih khungin, Mourtada Fall chuan goal khat a thawh bawk a, a tawpa langsar ber erawh Mizo tlangval Isak-a a ni - Thingsulthliah tlangval, Bawngkawna seilian Isak-a hian vawi nga vel zet goal khungna chance a nei a, a chhawr lo.

Mahse, Odisha goal nawr kawngah a langsar a, player of the match atan thlan a ni ta tho. Isak-a hian tun season ISL-a match kua an khelhah bul ṭan vekin goal khat a khung a, AFC Cup-ah match nga khelin goal hnih a khung bawk.

Aizawl FC forward hlui Isak-a chuan, "Kan coach thar Sergio Lobera nen hian kan inhre ngai lo. India-a club dang a enkawl lai khan ISL ka la khel bawk si lo a, tun season-a kan club a rawn enkawl hi kan vawi khat inhriatna a ni.

"Mahse, hmun chan tumin theihtawp ka chhuah a, ani pawhin min duhsakin, inrintawkna ka neih nan hmun min chantir a, ka beisei piah lam a ni. Min rintawkna hian mahniah pawh inrintawkna nasa tak min siam," tiin Vanglaini a hrilh a, coach Lobera rinna chuan thui tak a hruai thu a sawi.

Odisha tan hian Isak-a bakah Jerry Lalrinzuala leh K. Lalṭhathanga (Puitea) ten inkhel bul an ṭan a, bench aṭangin Jerry Mawihmingthanga a lut bawk - Hyderabad tan bench aṭangin Mark Zothanpuia leh Ramhlunchhunga te an lut bawk.