Axelsen leh Tai Tzu-ying an chungnung

Olympic mipa badminton champion Viktor Axelsen leh hmeichhe world number 1 hlui Tai Tzu-ying te chu Badminton World Federation World Tour Finals-ah an chungnung ber.

Badminton thiam zual pariat inelna BWF Tour Finals hi China ram khawpui pakhat Hangzhou-ah neih niin, mipa final-ah kum 29 mi Axelsen hian tualchhung tlangval Shi Yuqi chu straight game 21-11, 21-12 a hnehin a champion.

Denmark tlangval Axelsen chuan, "Ka lawm a, ka chau takzet bawk. Ka tan kum ṭha a nih rualin hun harsa tak tak ka tawn kum a ni bawk a, a hmawr bawkna a ṭha hi ka lawm," a ti.

Inelna ngaihhlut All England Open final-ah a chak lo a, anmahni rama khelh World Championship final lut mah se a vanduai zawk a ni bawk, tunah erawh a hun a thleng ve leh ta chiah.

Hmeichhe lam final-ah world number 4 Tai-i chuan Carolina Marin lakah game hloh hmasa mah se 12-21, 21-14, 21-18 a tho chhuakin a champion ve bawk.

Taiwan nula Tai Tzu-ying chuan, "Tournament khelh hma khan inbuat-saihna ka nei ṭha em em a, a rah chhuah a lo lang ta a ni. Carolina Marin khelh ṭhatzia ka hria, ani lakah chuan tihsual nei mang loa kan khelh a ngai," tiin a khelh danah a lungawi.

Spanish nula Marin hian hun rei tak chhung hliam a tuar a, a hliam dam hnua a lo kir lehnaah hian ṭha tak takin a khel leh tawh, chutihrualin tunhma lama mi bik a nihna ang tak kha chu a langchhuak thei rih lo deuh - hun a mamawh.

Champion chiah lo mah se Marin tan chanchin lawmawm a la awm zel. Olympic champion hlui hi tun dinhmunah world number 5 a ni a, European player zingah chuan a sang zual 10 zinga tel phak awmchhun a ni.