Thawnthu ngai bawk - Real an chak; goal khungtu Bellingham

Pathianni zan La Liga inkhelah Real Madrid chuan 4-1 in Villarreal an sawp a, goal khungtu zingah sawi nawn ngai hming pakhat a awm - Jude Bellingham a ni.

English midfielder bakah hian Rodrygo, Brahim Diaz leh Luka Modric ten goal khat ṭheuh an khung a, Villarreal tana Jose Luis Morales goal khung ve chu mualpho zualpui khuhna mai an chang.

Real-in hnehna an chan avangin league table chung ber an luah a, mahse, he thuziak i chhiar meuh chuan an dinhmun a danglam leh tawh mai thei - nizan khan hmahruaitu Girona leh Alaves an inkhel a, he thu buatsaih a nih lai hian result kan hre hman lo.

Hey Jude

Real tana goal a khung hmasak ber khan Beatles hla ring chungin, "Hey Jude" ti ngat chungin kan ziak a, khata ṭang khan kan la "Hey Jude" deuh char char rih chu a ni e - Jude Bellingham hming sawi kan bang dawn lo.

Kum 20 mi midfielder hian Luka Modric-a ball cross ṭha zet chu Real hmahruaina goal ni turin a khung a, league match 15 a khelha goal 13 a khungna chiah a ni - tun season inelna hrang hrangah match 20 khelin goal 17 a khung ta der a, assist vawi nga a nei bawk.

Real tan tun hnaia 'form' tak Rodrygo chuan minute 37-naah a khung ve leh bawk a, a tirah offside vangin pawm ni lo mah se Video Assistant Referee (VAR) hmanga en a nih hnuah pawm a ni. Brazilian forward hian tun season inelna hrang hrangah goal 10 khungin assist vawi ruk a nei - kum 22 chauh a la ni ve bawk a, Real hmabak a êng hle.

Beiseina thamral

Real-in 2-0 a hmahruai chungin chawlhlawk an hmang a, Santiago Bernabeu-a khel an nih bawk avangin chak tur a chiang tawh, tiin a sawi theih. Mahse, Villarreal an beidawng duh bik lo a, Morales chuan minute 54-naah si phurh a sut ṭhen.

Yellow Submarine-in beiseina an nei thar a, an beisei neih chhung erawh rei lo tak a ni. Minute 10 hnu lawkah Brahim Diaz chuan rintlak a nihzia pholangin an goal thumna a khung a, minute li hnuah Modric chuan a la tar lo tih nemngheh nan a khung ve leh bawk.

Mikhualna ramah Villarreal an tho leh tawh lo - Real-in hahdam takin hnehna an chang a, Pathianni zan hmaa an league match hnuhnung bera Real Betis nen 1-1 a inhnehtawk Real an tho leh chiang hle.

Lawm a kim lo

Real-in chiang takin hnehna chang mah se, an lawm a kim lo. Full back ṭha mi David Alaba chu hliam vangin lakchhuah a ngai a, a khup hliam hi ACL a nih avangin a chawl rei dawn tih a chiang - Real chuan zai a nih tur thu an sawi.

Madrid khaw club hian ACL vangin goalkeeper ṭha mi Thibaut Courtois leh defender Éder Militão te chu an chhawr thei lo mek bawk a, Real boss Carlo Ancelotti chuan, "Player dang kan chân leh ta. Thla li chhunga player pathum ACL vanga chân hi ka la hmu ngai lo.

"Mahse, engmah tihtheih kan nei lo. Kan tih tur chu hliam tam tak nei chung pawha beih fan fan hi a ni a, buaina tam tak ka nei chungin inpe zo tak leh huaisen takin kan bei reng a ni," a ti - Real hian hliam vangin Dani Carvajal, Eduardo Camavinga, Arda Güler leh Vinícius Júnior te an chhawr thei lo mek bawk.