PSG leh Lille inhnehtawk

Paris Saint Germain tan thil a awlsam vek bik lo - Ligue 1 champion nomawi humhim pawh thil awlsam tak a ni dawn lo niin a lang, an mikhualna ramah Lille nen 1-1 in an inhnehtawk.

Champions League last 16 an luh hnu khan Luis Enrique khan PSG ṭha zawk an lantir tur thu a sawi a, hei hi nakkum February atan a ni. Chutihrualin league lamah insiamṭhat an tum nghal tur thu a sawi tel bawk a ni.

Spanish manager Enrique naute hi Ligue 1-ah chuan chak tura rinkai an ni nghal ṭhin. Mahse, Lille laka goal khung turin vanneihna an mamawh, minute 66-naah Kylian Mbappe-a penalty hmangin hma an hruai hram.

Lille an beidawng duh bik lo, minute 90+4-ah substitute Jonathan David-a tauh luh hmangin si phurh an sut a, point khat ve veah an lungawi a ngai.

Enrique chuan, "Lille khan anmahni goal an veng thiam em em a, goal khung pawh kha a harsa. Goal khat kan neih khan kan chakpui mai dawn emaw tih hnuah goal kan chhuah.

"Minute 90 chhung inkhel kan thunun a, a tawp inthlahdah zeuh kha kan tuar ta a ni. Thlasik chawlh hmain inkhelh hmabak pakhat kan la nei, chutah chuan hma kan sawn a ni tih kan lantir a ngai," a ti. December 20 zanah Metz an mikhual ang.