Premier League Awards Player ṭha ber KDB; manager ṭha ber Klopp

September 12-ah Premier League season thar khelh a ni dawn a, Europa League leh Champions League-ah English club dam an awm tawh loh avangin season thar atan an inbuatsaih thei ṭan tawh. 

Covid-19 vangin season liam ta leh season lo awm tur a inhnaih lo thei lo a, season thar atana Premier League club ṭhenkhatin training an ṭan tawh laiin 2019-20 season awards an lo sem ve mek bawk a!

Kar hmasa khan Liverpool defender ṭhangduang Trent Alexander-Arnold chu Premier League young player of the season-ah thlan a lo ni tawh a, Premier League player of the year leh manager of the year pawh puan a ni leh ta. 

Manchester City-in Premier League nomawi chawi lo mah se Kevin de Bruyne mimal hnathawh fak loh a harsa a, player ṭha berah thlan a ni. Premier League-a a vawi khat nana Liverpool champion puitu Jurgen Klopp chu manager ṭha ber atan thlan a ni bawk. 

Champions League aṭanga Manchester City an tlak avanga lungawi lo Kevin de Bruyne-a'n team result vanga hnualna karah mimal hnathawh ṭhat vanga lawmna tur a nei a, Premier League-ah ani aia player thiam an awm lo. 

KDB hian season hman zawh takah khan City tan league match 35 khelin goal 13-a khungsak a, assist vawi 20 a nei bawk - Arsenal legend Thierry Henry-a'n 2002-03 a season khata assist ngah ber record a lo siam tawh chu a nihrual. 

Kum 29 mi midfielder hi season kua liam ta chhunga he chawimawina dawng thei Belgian player pathumna a ni a, a hma hian City legend Vincent Kompany leh Chelsea thiampuipa ṭhin Eden Hazard te chuan he chawimawina hi an lo dawng tawh. 

KDB hian chawimawina dawng tur hian Liverpool trio Trent Alexander-Arnold, Jordan Henderson Sadio Mane, Southampton forward Danny Ings, Leicester striker Jamie Vardy leh Burnley goalkeeper Nick Pope-a khum a, vote hi EA Sports website-a fans vote, Premier League club 20 captain leh football expert thlan bikte vote chhiar aṭanga lak a ni. 

Kum 30 hnua a vawi khat nan league-ah Liverpool an champion miau a, Jurgen Klopp tan chawimawina a luang lut zet - League Managers' Association manager of the year-a thlan a nih hnuah Premier League manager of the season-ah thlan a ni leh ta. 

Klopp hian he chawimawina dawng tur hian Chelsea boss Frank Lampard, Leicester coach Brendan Rodgers leh Sheffield United manager Chris Wilder-a khum a, a manager khum tak te pawh hian hna an thawk ṭha hlawm hle. 

Lampard hian transfer bazar-ah player a lei thei lo chungin Blues chu palina a nihpui a, Rodgers hian match tawp ber thlengin Foxes chu top four a 'fight' pui thei a, Championship aṭanga kai hlim an ni chungin Wilder hnuaiah Sheffield hi pakuana an ni phak bawk. 

Klopp-a hnuaiah Liverpool-in league match 38 aṭangin vawi 32 hnehna an chang a, point 99 ngawt an hlawh chhuak - anmahni hnaih bertu City aiin point 18 ngawtin an sang fal thei a ni.