Buaina ka nei lo ang - Nadal

Tennis season tharah Rafael Nadal a lo kir dawn a, world number 1 hlui lo kir tur hian sawi a hlawh - Spanish star hian a hun tawp hnai tawh mah se buaina nei loa a inkhelh theih a beisei thu a sawi.

Grand Slam vawi 22 champion tawh Nadal hi kumin January thlaa khelh Australian Open-ah khan a inhliam a, a hnuah a la inkhel leh lo. French Open 2023 khelh dawn khan, season thar hi a tan hun hnuhnung a nih tur thu a sawi chhuak.

Nakkum January thla mai hian Australian Open 2024 an khel dawn, season khat chhunga Grand Slam hmasa berah hian Nadal pawh a inlan dawn, tennis ngainatute chuan Melbourne Park lam an hawi leh ṭhup dawn a ni.

World number 1 hlui, tuna world number 664 ni ta Nadal chuan, "A nihna takah chuan ka tana tennis kum tawp ber pawh a ni ngei dawn niin a lang, a pawn lam boruak vanga buai mai erawh ka tum lo.

"Tournament ka hmachhawn apiang a ṭha thei ang bera khelh ka tum dawn a, engtikah nge ka hun tawp chu a lo thlen dawn tih erawh ka sawi thei lo, hei chu tunah chuan thu awmze nei lo mai a ni rih," a ti.

Major title lak hnem lamah Nadal hian Novak Djokovic (24 titles) a phak lo tawh a, season tharah hian lo kir pawh ni se a inkhelh loh rei avangin inelna liana champion leh nghal mai chu a harsa tawhin a rinawm - thil theih loh erawh a ni lo thung.