Inter Milan an kang sang

Serie A champion tum inum karah Inter Milan an rawn dawk chhuak, an elpui club dang chet fuh loh karah Inter hian Lazio 2-0 in an hneh a, match 16 aṭanga point 41 neiin anmahni hnaih bertu Juventus lakah point liin an sang ta.

Pathianni zan Serie A inkhelah Inter tan hian Lautaro Martinez leh Marcus Thuram ten goal khat ve ve an khung a, mualneitu Lazio lamin a chhanletna tur an nei lo, point 21 chauh an la neih avangin 11-naah an awm.

Inter hmatawng pahnih hian season duhawm an hmang mek. Argentina striker Martinez hian tun season chhungin Serie A goal 15 a khung tawh bakah assist vawi hnih neiin, Thuram pawhin goal sarih leh assist vawi ruk a nei tawh.

Nerazzurri striker Martinez chuan, "Kan hnena Marcus Thuram a lo kal khan, ani bakah player lo kal tharte kha ka bia a, an hnenah chuan inelna zawng zawnga champion kan duh thu ka hrilh.

"An phur em em vek a, anni ho nena season duhawm kan hmang thei hian min tihlim. A bik takin Marcus nen kan inkawp rem hle a, tlarhma lamah nasa takin kan inpui tawn," a ti.

Inter hian a zawnin tun hnaiah Coppa Italia leh Supercoppa Italiana te vawi hnih an la kawp thei. Tun season atana an tum bulpui ber chu Serie A nomawi chawi a ni ang.