Kane record siam zanah Bayern an chak

Harry Kane-a'n Germany-ah record a siam belh zel. Pathianni zan khan Bayern Munich chu VfB Stuttgart lakah 3-0 in hnehna a chanpui a, goal hnih a khung avangin Bundesliga-a goal 20 khung tling tura match mamawh tlem ber record a siam - match 14 chiah a mamawh.

English striker Kane hian minute hnihna lekah goal hmahruai a khung a, minute 55-naah a goal hnihna khungin, Kim Min-jae chuan Bayern tana a goal hmasa ber khungin a tawp a khar thung.

Bayern vanneih zan ni se, goal tam zawk khung thei an ni. Mahse, Thomas Muller leh Kim Min-jae te goal khung chu offside vangin pawm a ni lo a, Stuttgart mualpho lutuk tur an him.

Kane hian Hamburg legend Uwe Seeler-a record chu khumin, ani hian goal 20 khung turin match 21 a mamawh a, hei hi 1963-64 season daih tawhah khan a ni - tuna Manchester City striker Erling Haaland hian kum 2020 khan Borussia Dortmund tana a khelh laiin match 22-ah goal 20 a lo khung tawh bawk.

Bundesliga season khat bikah chuan Bayern leh Germany legend Gerd Muller khan 1968-69 season-ah khan season match hmasa 14-ah tho goal 20 a lo khung tawh a, Kane hian he record hi a nih rual.

Bayern hi table-ah pahnih an nih chhunzawm a, hmahruaitu Bayer Leverkusen chu point liin an phak lo mek - match khatin an khel tlem thung. Xabi Alonso enkawl Leverkusen hian 3-0 in Eintracht Frankfurt an hneh a; Victor Boniface, Jeremie Frimpong leh Florian Wirtz te chuan goal khat ṭheuh an khung.