Hamilton-a'n Schumacher a khum

Lewis Hamilton chuan Formula 1 Spanish Grand Prix-ah hnehna a chang a, dawhsan (podium) lawn hnem lamah Michael Schumacher-a record vawi 155 chu khumin a ṭum 156 nan a lawn.

Mercedes driver hian season kal laia intlansiak vawi ruk awm tawh zinga paliah hnehna a chang thei a, driver championship hmahruaitu a nih chhunzawm zel - a nomawi kawl lai pawh a humhim theih ngei a rinawm ta hle.

Circuit de Barcelona-a intlansiakah Hamilton-a'n a hmasa ber aṭangin bul a ṭan a, harsatna lian tham tawk loin hnehna a chang. Silverstone tlan kawnga tyre lama buaina an neih chu an chingfel niin a ngaih theih.

Hamilton elphak bertu Max Verstappen chu pahnihnaah a thleng. Red Bull driver hian a hma a awm Britain tlangval a thlah fal duh bik lo, championship lamah pawh a um ve zel - Mercedes driver pakhat zawk Valtteri Bottas chu pathumnaah a thleng thung.

World champion vawi li ni tawh Sebastian Vettel chu pasarihna a ni. German driver hian Ferrari car a khalh hun chhungin world champion a ni thei dawn lo tih chu a chiang tluk a ni tawh, a teammate Charles Leclerc chu lap 36-naah khawl lam chian lohna a nei a, a tlan tluan ve thei lo.

Lewis Hamilton-a'n podium lawn hnem ber record (vawi 156) a siam ta a, car intlansiakna sang berah hian vawi 88 zet hnehna a chang ta - chak hnem ber Schumacher (91 wins) chauh a chungah a awm tawh.

Kum 35 mi Hamilton-a'n champion nomawi chawi hnem lamah pawh Schumacher chauh hi tluk loh a nei, kuminah hian a champion thei a nih chuan a vawi sarih nan hlawhtlinna a chang dawn tihna a ni, sulhnu ropui awmsa hi nih rualin a khum chho zel a nih pawhin a mak lo ang.

Britain tlangval Hamilton chuan, "Intlansiak hnuhnung pahnihah tyre vangin kan buai, tunah erawh ṭha takin kan tlan thei hi team thawhrah liau liau a ni. Mimal record hi chu dah pawimawh hmasak tur a ni lo, ṭha taka inelna kan hmachhawn a nih chuan hetiang hi chu a rawn thleng mai," a ti.