World Snooker Championship 2020 A vawi ruk nana world champion O'Sullivan

Khawvela snooker player ropui ber pawl Ronnie O'Sullivan chuan World Championship title vawi ruk a lakna ni turin World Snooker Championship 2020-ah champion nomawi a chawi a, final (best-of-35 frames)-ah amah ang thoa English mi Kyren Wilson chu 18-8 in a hneh a ni. 

O'Sullivan-a tan world title-a vawi ruk lakna a ni chungin kum 2013 hnua a lak leh vawi khatna a ni a, ranking event bika vawi 37-a champion-na a ni bawk - vawi 36 ranking event title lo la tawhtu Stephen Hendry-a record chu a rawn khum.

Kum 44 mi O'Sullivan hi kum 1978-a kum 45 mi nichunga World Snooker Championship title latu Ray Reardon hnua champion thei upa ber a ni bawk a, world title lak hnem lamah Reardon leh Steve Davis-a tluk ta chiah bawk - world ranking lamah pahnihna a ni leh ta bawk a, nikum champion Judd Trump a tluk rih lo. 

O'Sullivan hian hnehna a chan vangin £500,000 (Nuai 490.63)-in a hausak belh a, a hlim hle. O'Sullivan chuan, "Title lam hi ka ngaihtuah ngai lo. Naupang ka nih laiin tuna ka awmna hmuna awm hi ka mitthla ngam lo - he hmun thlen a, heng zawng zawng neitu ka ni ta hi chu mumang, a tak rama thleng ta ang a ni," tiin a hlim thu a sawi.