RG Stadium-ah Chanmarians an ‘Shabash’

Zote Toyota MPL10 semifinal-ah Chanmari FC-in Chawnpui FC 3-0 in an sawp a, Laldampuia hoin RG Stadium-ah Chanmarians an 'Shabash'. Chanmari hian MPL nomawi vawi hnih an chawi tawh a, a lungthu kim nan tun season-ah champion ngei an tum. Final hi December 22, Zirtawpni zan dar 8:00-ah khelh a ni ang.

Thawhṭanni zan inkhelah hian Chanmari tan Lalkhawpuimawia'n first half-ah a tauh lut a, captain Lalrinchhana Tochhawngin second half-a goal hnihna a khung hnu lawkah Laltlanzova tih ṭhat vangin Chawnpui defender Laltluangliana'n an lamah a tilut. Chawnpuiin a chhanletna an nei lo a, Lalrindika Hmar tan MPL nomawi chawi turin a nghah leh rih a ṭul dawn a ni.

Inbuatsaihna ṭha chu

Inkhel ṭan phat aṭangin inkhel a nung a, chance hmuh tur pawh awm. Chawnpuiin ball an chang tam zawk a, league round-a pakhatna Chanmari an che thei lo. Vanlalthanga mual ding lam aṭangin a cross a, Tea Chinzah tan ball duhthusam ni mah se a ball tauh chu defender Ramngaihsanga'n a dang hman.

Chawnpui captain Lalruatfela'n huai zetin Peter Lalrinhlua corner tauh mah se goal zawnah a kal lo. Ruatfela kawppui Lalhmangaihsanga ball pet pawh keeper Zothanmawia'n ṭha takin a dansak. Semifinal atan Chawnpui inbuatsaihna ṭha tih a lang.

Goal an chhuah hnuah pawh siphurh sut lehnghalna tur an nei a, Joseph Lalmuanawma'n ṭha zeta a lakluh hnuah a cross ball duhthusam chu Peter-a'n keeper zawhah chiah a pet. T. Mawia awmna hmun a dik a tih theih bawk.

Khawpui a ri

Mahse maw, semifinal chin tawhah chuan player tawnhriat nei ṭha an danglam ṭhin. Chanmariin chutiang player chu an kawl a, a hming chu Lalkhawpuimawia a ni.

Minute 32-naah Zozoa cross luh chu awmna tur hmun taka awm Khawpuimawia'n chiang zetin a tauh lut. Chawnpuiin offside ni turah an ngai a, mahse defender Hmangaihsanga a fual avangin Kelkang pa goal hi sawisel bo a ni.

Chanmariin goal an khung hnuah inrintawkna an ngah sawt a, AB-a'n keeper John-a tan hna a siam sak bakah Zozoa pawhin mual dinglam sir aṭanga ṭha taka lalutin goal pawnah chiah a pet. Zozoa a tlan chak hle. R. Laldanmawia hmuh tur a tam lo a, mahse tawnhriat nei player danglamna a lang leh ṭhin. Sialhawk Express corner pet chu captain Rinchhana'n a tauh lut a, minute 53-naah 2-0 a ni.

Chawnpui an fimkhur lo a, mual laiah Khawpuimawia'n Peter-a ball chan lai chhuhsakin Zozoa tan a pe. Champhai Kanan tlangval Zozoa hian goal-ah ṭha zetin a pet a, keeper John-a'n dang mah se a per chu Tluangliana'n an lamah su lut.

Chanmari FC-in goal thum an khung avangin darkar pawh tlin hmain tur a chiangah a ngaih theih tawh. Chutihrualin Chawnpuiin goal khung tumin an nawr a, Avida'n cross bar a pet per bakah David-a ball pet pawh goal pawnah chiah a kal.

Chutihrualin Chawnpuiin goal venhim aia goal nawr an ngaih pawimawh avangin tlarhnung a pawp. Chanmariin goal chance an ngah zawk a, Khawpuimawia'n goal hnih dang khung belh theihna nei mah se keeper John leh Tluangliana ten an dansak. Injury time-ah substitute Vincent Lalduhawma cross ṭha chu bench aṭanga lut tho Lalruatmawia'n goal ruakah a khung lo. Chanmariin 3-0 in hnehna an chang a, final-ah Mizoram Police leh Chhinga Veng inkhela chak zawk an hmachhawn ang.

Phuba an la

Chanmari hian December 1, Zirtawpni khan round 11-ah Chawnpui FC an hmachhawn a, 2-0 in an chak lo. He inkhel result avang hian coach K. Malsawmkima'n a hna a chan a, Laldampuia'n hun ṭha a neih phah. Dampuia hnuaiah Chanmari hian match li khel tawhin vawi thum an chak a, an chak loh ṭum hian semifinal an luh tawh avangin team ṭha ber an luhtir lo.

Semifinal-ah Chanmari hian league round-a an hneh loh Chawnpui lakah phuba an la a, Dampuia hoin champion ngei an tum. Chawnpui an hneh ṭum hian league round aiin Chanmari FC-in ṭantu an ngah tawh zawk a, an hla pui 'Shabash' pawh an sa rual leh tawh. Mahse, MPL2 leh MPL5 an champion ṭuma Chanmari FC ṭantute au thawm erawh an la pha lo hle.

---------------------

Chak tumin theihtawp chhuahin kan inbuatsaih a, kan tihsual vangin hremin kan awm. Chanmari goal khung kha dan theih vek an ni a, 3-0 a nih hnu kha chuan thawhchhuah a har tawh. Chanmari an khel ṭha zawk a, champion ngei turin duhsakna ka hlan. Chutihrualin season tluana ṭha taka min thlawptu Chawnpui thuneitute leh ka player-te chungah ka lawm e.
- Lalrindika Hmar,
Chawnpui FC coach

Duhthusam ang vekin a khel thei lo a, hnehna chang mah ila insiamṭhatna tur kan nei. Chutihrualin kan duh ber chu chak a ni a, kan result-ah ka lawm. Police leh Chhinga Veng hi team ṭha ve ve an ni a, coach tawnhriat nei ṭha ve ve. A tu zawk pawh chak se, kan team min hneh tur chuan an hah ve viau a ngai ang. Duh thlan zawk tur pawh ka hre lo.
- Laldampuia,
Chanmari FC coach