Spurs keeper thar tur Joe Hart

Manchester City goalkeeper hlui Joe Hart chuan Burnley-a a contract zawh rualin Tottenham Hotspur a zawm dawn a, he thu ziak i chhiar meuh chuan official-a puan zar a ni tawh hial ang. 

Kum 33 mi goalkeeper hi Premier League club Burnley tan a khel mek a, June 30-ah a contract a zo tawh dawn - he thu buatsaih lai hian medical a hmabak mek. England tana vawi 75 inlan thei goalkeeper hian 2018-19 season ṭan dawn khan Burnley hi a zawm a, a season hmasa berah league match 19 khel mah se Tom Heaton lakah first choice a nihna chu a hloh. 

Season hman zawh takah khan keeper ṭhangduang Nick Pope-a thachhang dawltu atan hman a ni a, league match inlan miah loin Cup inelnaah erawh match thum a khel ve. Spurs-ah hian first choice nih beiseia lut tur niin a lang lo a, France international Hugo Lloris-a thachhang dawltu ni turin Paulo Gazzaniga nen an inel ang. 

Manchester City tana Premier League nomawi pahnih lo hlawh chhuak tawhtu Hart hian kum 2016 khan City aṭangin Torino chu loan-in a zawm a, a hnuah West Ham tan loan-a khel lehin Burnley-a zawm dawn khan kum 2006-a a pan Etihad Stadium chu a nghetin a chhuahsan ve chauh a ni.