Mizoramin boxer pasarih an tir

7th Elite Women National Boxing Championship 2023 hmachhawn turin Mizoram Boxing Association (MIZBA) chuan hmeichhe boxer pasarih a tir a, inelna hi December 21-27, 2023 chhungin Noida, Uttar Pradesh-ah neih a ni ang.

Mizoram team hi coach B. Lalhriatpuii (MSSC NRC) leh manager Lalhruaitluanga ten an hruai a, Mahruaia hi Khawzawl District Boxing Association President a ni. November 25, Inrinni khan Mizoram aiawh tur thlanna hi neih a ni a, November 28, Thawhlehni aṭangin training an ṭan.

Mizoram coach B. Lalhriatpuii chuan, "Training kan nei ṭha a, medal lak ngei pawh kan inbeisei. Inelna hi National Games-a tel thei tur zawnna a nih bawk avangin a pawimawh hle," tiin Vanglaini a hrilh.

Mizoram aiawh hian tawnhriat nei ṭha Lalbuatsaihi leh Lalfakmawii Ralte te an la tel dawn a, anni pahnih hi Sashastra Seema Bal (SSB)-a boxing thiam vanga lut an ni. National bakah international level thlenga medal la tawh an ni.

Chatlang boxer Naom Chingsannuam hi National Centre of Excellence, Guwahati-ah a inzir mek a, Siaha boxer L. Vanlalduatsangi hi Khelo India Centre of Execellence, Aizawlah a inzir mek bawk. TC Lalremruati hi Excise & Narcotics Department-ah hna a nei tawh a, Rudy Lalhmingmuani hi SAI, Aizawla inzir niin Champhai nula Vanlalhriatpuii hi kum bithliah inelnaah Mizoram tan a fehchhuak fo tawh bawk.