Jeje-a'n Mizoram Premier League a fak

India international hlui Jeje Lalpekhlua chuan Zote Toyota MPL10 semifinal-a Chanmari FC leh Chawnpui FC inkhel a hmunah a en a, Mizoram football hmasawnna kawnga Mizoram Premier League pawimawh thu a sawi.

Jeje chuan, "Mizoramin league mumal tak MPL kan nei chho a, chumi avanga tun dinhmun thleng chho thei kan ni. MPL chhawrtu ber chu player-te kan ni a, player aiawh pawhin MFA leh Zonet chhungkua leh sponsor-tute zawng zawng chungah lawmthu ka sawi," tiin MPL a fak.

Mizoram Premier League awm hnuah Mizoramin Santosh Trophy leh National Games-ah an champion a, MPL club Aizawl FC chu I League-ah inpetlingin NorthEast aṭanga champion hmasa ber leh awmchhun an ni hial. Mizo player ṭhahnem tak, phai rama academy-a awm kher loin MPL kaltlangin I League leh Indian Super League club-ten an la.

India captain hlui Jeje chuan sawi chhunzawmin, "Ka inhliam a, ka in zai a, ka dam chiang thei si lo. TV-a inkhel en ringawt pawh kha ka duh lo ṭhin a, hun rei tak TV-a inkhel pawh ka en lo a. Tunah pawh hetia kan chawlhsan hnu hian inkhel en mai chu ka ti thei a, mahse an han pet goal a, an celebrate ka hmuh hian keimahah a thar leh ṭhin a, a hrehawm ka ti ṭhin," tiin inkhelh a la châk thu a sawi a, tuna player-te chu 'style' a ral loa inkhel chauh ngaihsak hmasa turin a chah bawk.

Jeje hi kumin Mizoram inthlanpuiah khan South Tuipui bialah MLA atan thlan tlin a ni.