VVD-a'n Roy Keane a chhang ve leh ta

Anfield-a Liverpool leh Manchester United inkhelah goal a lut lo a, fan-ten an beisei ang result an hmu lo - mahse, English club inhal ber ang hiala tam takin an ngaih intawng kha an ni a, inkhelh zawh hnu thlengin thawm an nei zui.

Liverpool defender chhuanvawr Virgil van Dijk chuan inkhelh zawhah, "Chak tuma inkhel team pakhat chiah kan awm," tiin United khelh dan a sawisel a, hei hi United legend Roy Keane chuan a ngai thei lo hle.

Sky Sports pundit Keane chuan, "A ṭawngkamah khan chapona a tel a, khatianga United a sawi kha a mawi lo hle. Kum 30 chhunga vawi khat chiah league nomawi chawi thei club tan a khel tih inhre rawh se," a ti zui - lem a harsa ang!

Ngawih chuh lo VVD!

Liverpool indinthar leh nana player pawimawh ber ang hiala tam takin an ngaih Van Dijk a ngawi mai duh bik lo a, Dutch defender chuan, "Roy Keane hi ka ngaina a, min lo chhanglet a nih pawhin ka hrethiam.

"United ṭan rum ruttu a ni a, a lo lungawi lo a nih pawhin ka hrethiam. Mahse, ka rilrua awm dik tak ka sawi chhuak ve a ni mai a, chapona pakhatmah a awm lo. Kha inkhel en zawng zawng kha chuan ka ngaihdan min ṭawmpui vek ang.

"Mahse, tunah chuan theihnghilh kan tum ang. Goal khungna chance nei reng chunga kan khung lo kha a hrehawm em a ni," a ti - kha inkhelah khan Liverpool hian 69% ball changin vawi 34 ngawt shot an nei a, mahse, tun season-a a vawi khat nan mahni mualah an chak zo lo.

Nghilh a har

VVD chuan an tan theihnghilh a hun tawh thu a sawi rualin United laka goal an khung lo chu a ui thlu ngang a ni ang, a sawi leh ṭhin! Kum 32 mi defender chuan, "A chang kha chuan kan tum ulh mah mah ṭhin nia hriat chang ka nei a, a hnung lama an inhnawhkhawm kha ṭhiah a harsa em em a ni.

"Theihtawp kan chhuah a, kan theihna zawng zawng kan hlan. Mahse, kan vanneih loh ṭum kan tawng a ni. A chang chuan kan tum leh lutuk a, kan talbuai ni ber te pawhin ka hria. Mahse, hei hi football chu a ni," a ti.

Liverpool hi zanin dar 1:30-ah League Cup quarterfinal khel turin an inlan zui dawn a, team ṭha West Ham an hmachhawn dawn - Inrinni zanah Arsenal nen league match an khel zui dawn a, Jurgen Klopp-a tan player thlan thiam a ngai dawn.

A harsa dawn

Liverpool-in December 23 zanah Arsenal an hneh chuan league hmahruaitu an ni thei dawn a, hei hi Klopp-a'n a hre kar ang - chutihrual chuan zanina khelh tur hi League Cup quarterfinal a ni tawh a, nomawi a hnaih tawh avangin inenchhin a harsa dawn.

Klopp-a'n fimkhur tak chungin squad a siksawi a rinawm a, keeper-ah Caoimhin Kelleher chuan Alisson Becker aiah bul a ṭan chiang tura ngaih a ni a, VVD hahdamtirin Jarell Quansah leh Joe Gomez an inkawp ang a, Andy Robertson a la inhliam avangin a aiawhtu Konstantinos Tsimikas chhawr rim lutuk a fuh lo mai thei a, chuti a nih chuan kum 19 mi Luke Chambers-a'n bul a ṭan thei ang.

United laka inhliam Ryan Gravenberch tan a la hma mah mah a, midfield-ah Wataru Endo, Harvey Elliott leh Curtis Jones an inkawp thei ang. Tlarhmaah Mohamed Salah hi a luh hram a rinawm a, Darwin Nunez chawl hahdamin, Luis Diaz leh Cody Gakpo ten Salah an thlawp a rinawm.