Inter mualah Bologna

Zanin dar 1:30 hian Inter Milan chuan Coppa Italia last 16 khel turin Bologna an mikhual dawn - Serei A hmahruaitu Inter coach Simone Inzaghi chuan eng inelna pawh an ngaihpawimawh vek thu a sawi avangin zaninah chak an tum ang.

Inter hi champion lai an ni a, zanina an inkhelhna tur hi San Siro a nih bakah season an hman ṭhat em avangin chak tura rinkai zawk an ni ang. An chak a nih chuan nikum final-a an hneh tak Fiorentina nen quarterfinal-ah an intawng thei dawn a ni.

Season hmasa khan Inter hian Coppa Italia leh Super Cup lain Champions League final an thleng bawk a, mahse Serie A lamah erawh an hlawhtling lo thung, kuminah hian league champion nih tumin thapui an thawh mek.

Inzaghi chuan, "Eng inelna pawh kan ngaipawimawh vek, kan hmaah match khelh tur ngah mah ila kan buai loh ka beisei. Bologna lakah pawh hian a ṭha thei angin kan inrem ang," a ti a, an khingpui tur team tan chuan hriat nuam tak a ni hran lo ang.

Inter hian tlarhma lamah Lautaro Martinez leh Marcus Thuram te an chhawr thiam em em a, tunlai hmatawng inkawp rem berte zinga mi an ni. Kar tawpah Serie A match khelh tur an neih zui avang erawh chuan a tu emaw zawk chu an chawlh hahdam a rinawm.