Eriksen-a'n Lockyer a hnem

Manchester United midfielder Christian Eriksen chuan a dinhmun tawn tawh ang tawng mektu Tom Lockyer a thlawp thu a sawi a, Luton captain chu ṭha chhuak leh thuai tura a beisei thu a sawi bawk.

Kar tawp Premier League inkhelah Tom Lockyer hi khelmual chhungah lungphuchawl vangin a tlu a, stadium-ah enkawl a nih hnuin damdawi inah hruai a ni a, enkawl chhunzawm mek a la ni.

Euro 2020 khelh laia lungphuchawl vanga lo tlu tawh Eriksen chuan, "Tom Lockyer hi a dinhmun a ṭhat ngei ka beisei a, ṭha chhuak leh thuai turin ka duhsak bawk. A dinhmun ka hriat khan ka rilru a luah nghal a, thlawptu a mamawh lai tak a ni tih pawh ka hria.

"Thurawn ka pek duh chu amah enkawltu doctor ngaichang thiam se la, thutlukna siam turin hmanhmawh lo bawk se ka duh a, amah chauh ni loin chhungkua an inrawnkhawm ngei pawh ka beisei," a ti.

Welsh centre back hi kumin May thla khan Luton-in Premier League an khelh theihna tura playoff an khelh ṭumin a lo tlu tawh bawk - kumin chhungin vawi hnih a tlu tawh tihna a ni a, tun ṭumah hian a lo kir leh thei ang em hriat a la ni lo.