Joshua hian min hlau - Wilder

Deontay Wilder chuan Anthony Joshua chuan amah hmachhawn turin huaisenna a nei tawk lo niin a sawi a, "100% in min hlau tia sawi chu ka duh lo a, mahse, 75% tal chu niin ka hria," a ti!

Joshua hian tun hnaiah Wilder hmachhawn a châk thu a sawi a, mahse, Inrinnia Otto Wallin nen an inhnek hunah a chak chuan IBF title fight phawt a duh thu a sawi - IBF kawnghren hi Oleksandr Usyk chuan a kawl mek.

IBF danah Usyk hmachhawn tur chu Filip Hrgovic a ni. Mahse, Usyk hian February 17-ah Tyson Fury a hmachhawn phawt dawn a, rematch clause awm chu tihnun zui a nih chuan IBF title hi hlih niin, Joshua leh Hrgovic ten an inchuh dawn.

Wilder chuan,"Enge thleng chu kan hre zel ang chu. A hmaa kan inbiak ṭhin ai kha chuan kan thleng thui viau tawh ania," a ti a, American boxer chuan sawi zawmin, "Joshua nen hian sumah kan inrem thei lo pawh a ni lo. Ring chhung a lut ngam lo a ni ber.

"Joshua ngawt hi ka dem lo. Amah enkawltu a promoter te hi ka dem mah zawk. Joshua hi an sum lakluhna ber a ni a, midang an nei lo," a ti a, amah an hmachhawn chuan chak loh a, nakin zela sum hloh an hlau ni angin a sawi.

December 23, Inrinni hian 'Day of Reckoning' tih hming chawiin boxing event ropui chu Kingdom Arena, Riyadh, Saudi Arabia-ah neih a ni dawn a, Joshua hian Otto Wallin hmachhawnin, Wilder chuan Joseph Parker a hmachhawn dawn bawk.

Kum 34 mi Joshua hian vawi 29 fight hmachhawnin, vawi 26 a chak a, vawi thum a tlawm. WBA, WBO leh IBF title te vawi khatah lo kawl vek tawhin, Usyk lakah kum 2022 khan a chân. Kum 38 mi Wilder hian vawi 46 fight hmachhawnin, vawi 43 a chak a, vawi 42 a khingpui a knockout.

Vawi hnih tlawmin, vawi khat draw a nei a - a chak loh pathum hi Tyson Fury lakah vek a ni. Kum 2015-2020 inkar khan WBC title a kawl a, Fury lakah a chân.