Club World Cup final khel tur Fluminense

Brazilian club Fluminense chuan FIFA Club World Cup final lut turin Al Ahly chu 2-0 in an hneh a, Jhon Arias leh John Kennedy ten goal khat ve ve an khung - Egyptian club Al Ahly-in a chhanletna tur an nei lo.

King Abdullah Sports City, Jeddah-a inkhelah team pahnihin goal an khung lo reng a, minute 71-naah Brazilian club tan Real Madrid defender hlui Marcelo chuan penalty a hlawh chhuak.

Vawi hnih ngawt post pet per tawhtu Arias a lo pen chhuak a, Colombian winger hi a vanduai reng bik lo - goal-ah a chantir a, 1-0 a ni. Minute 90-naah kum 21 mi Kennedy chuan a belhchhah ve leh a, 2-0 in South American champion an chak.

Fluminense tan kum 35 mi Marcelo a khel ṭha a, Fiorentina, Juventus leh Inter Milan defender hlui, kum 40 mi Felipe Melo a khel ṭha viau bawk - Melo hian Percy Tau goal shot chance ṭha lutuk a tackle hman chu pui tak a ni.

Kum 43 mi keeper Fábio lam hmaih a thiang lo. Al Ahly hian vawi 18 zet shot nei mah se tawnhriat nei ṭha keeper an paltlang thei lo a, Brazlian club an vannei.

CWC semifinal-ah hian Fluminense tana bul ṭan player 11 chu South American vek an ni a, pakua chu Brazilian an ni. African champion Al Ahly tana bul ṭan 11 pawh African vek niin, player pakua chu Egyptian an ni ve bawk.

Nizan khan semifinal inkhel dangah Champions League nomawi kawltu Manchester City leh Asian champion Urawa Red an inkhel a, he thu buatsaih a nih lai hian an result kan hre hman lo - he inkhela chak zawk hian December 22 zanah Copa Libertadores champion Fluminense nen nomawi an inchuh ang.