Dovizioso-a'n hnehna a chang

Pathianni zan khan MotoGP Austrian Grand Prix tlan a ni a, Ducati rider Andrea Dovizioso chuan hnehna a chang. Intlansiakah hian Franco Morbidelli leh Johann Zarco te an chesual - tawnhriat ngah Valentino Rossi a vannei hle thung.

Red Bull Ring-a intlansiakah Morbidelli leh Zarco te kawng kawiah an intai palh a, kawng sirah na taka tlu chhuakin an bike pawh a chhe viau. An chetsual lai hian 300km/h vel zeta chakin an tlan a, anmahni an chetsual bakah midang an tibuai hle.

Kawng sirah bike tleng chhuakin kawng kawi lai a nih avangin tlan kawngah a tawlh lut tlang leh a, bike hi invawrh zuiin an hnunga tlan Rossi a deng teuh hle; vanneih thlak takin Rossi a fuh lo hlauh.

Kum 41 mi Rossi chuan, "Morbidelli bike khan min delh hlum lo chauh a ni, Zarco bike nen pawh khan kan inhlat lo hle. Ka hlauthawng hman em em, rilru a chiai avangin intlansiak chhunzawm pawh a harsa," a ti. Italian rider hi panganaah a thleng a ni.

Rider ṭhenkhatin chhiatna an tawh karah Dovizioso a ding chang a, Italian tlangval hian intlansiak neih hmain season tharah chuan Ducati team a chhuahsan tur thu a sawi chiang a, inelna a hmachhawn apiang hi Ducati nena an hun hnuhnung a ni zel tawh.

Inelna neih hnuhnung zawka pakhatna Brad Binder chu tlan ṭha viau mah se palina aia sang a ni phak lo. Championship hmahruaitu Fabio Quartararo chu pariatnaah thlengin beisei angin table lamah a kal fal thei bik lo bawk.

MotoGP champion lai Marc Marquez chu hliam vangin a la inlan thei lo. Spanish rider hi a ban ruh tliak vawi hnih zai a ni a, season kal laiah point a la nei ve lo. August 23, Pathianni tlaia Syria Grand Prix an tlan hunah chuan a inlan thei tawh tura beisei a ni.