La Liga table chung berah Girona an awm zel

Premier League 2015-16 season-ah khan Leicester City chuan Premier League nomawi chawiin, football thawnthu ngaihnawm min hnutchhiah a, La Liga lamah khatiang ang taka thawnthu ngaihnawm kha a thleng ve leh lo ang tih a sawi theih loh.

Beisei loh taka league hmahruaitu Girona chuan Thawhṭanni zan khan an mikhual Alaves chu 3-0 in an sawp a, La Liga hmahruaitu an nihna chu an chhunzawm zel - match 17 khelhah point hnihin Real Madrid an tlan pel.

Girona tan striker 'form' em em mai Artem Dovbyk chuan goal hnih khungin, Portu chuan goal khat a khung ve bawk a, hun tawp thlenga goal dang lut loin Girona an chak.

City & Girona

Girona khelmualah mualneitu team-in goal khung turin hun an mamawh rei lo. Minute 23-naah Artem Dovbyk chuan goal hmahruai a khung a, minute 42-naah Portu chuan a belhchhah - Manchester City aṭanga loan-a an hawh Yan Couto siamsak a ni.

Kum 21 mi Couto hian minute 59-naah penalty a hlawh chhuak zui a, hei hi Dovbyk chuan goal-ah a chantir - Girona-ah hian Manchester City neitu City Football Group an tel a, anni hian Spanish club-ah hian 47% share an nei.

Hei vanga Couto pawh hi loan-a hawh thei an ni a, Brazilian right back hi tun season an thlen theih nan hian a thawhhlawk hle. 5ft 6in leka sang ni mah se, theihna a nei sang a, kumina a chet ṭhat avangin October international break-ah khan ram tana koh niin, match hnih a khel tawh.

A hming Dovbyk

Tun dinhmun Girona-in an thlen theih nana player langsar chu Dovbyk a ni. Kum 26 mi Dovbyk hian nipui lai khan Ukrainian Premier League club Dnipro aṭangin Spanish club hi a zawm a, a man hi pound maktaduai ruk niin, an club player man to ber a ni.

Ukraine international hian season hmasa khan Dnipro tan hian match 39-ah goal 29 ngawt a khung thei a, Spanish top flight league-ah pawh a inthlahrung lo hle - league match 16 a khelh aṭangin goal 10 a khung ta.

Tun season La Liga-a goal khung tam lama a tluk loh awmchhun hi Jude Bellingham a ni a, English midfielder hian goal 13 a khung tawh thung.