Halep dinhmun a chiang lo

Hmeichhe tennis world number 1 hlui Simona Halep chu inkhelh chawlhsan mai thei dinhmunah a ding, inkhel thei loa an hrem mekna chu tih tlemsak a nih loh chuan atan tennis court luh leh ngaihna a awm tawh lo niin a sawi.

Romanian nula Halep hi damdawi hman phal loh hmanga puh a ni a, kum li chhung inkhel thei lo tura hrem mek a ni. Infiamna lama thubuai ngaihtuahtu sang ber Court of Arbitration for Sport hnenah a zualko thei dawn, nakkum February thlaah a thubuai hi ngaihtuah a ni ang.

Grand Slam vawi hnih champion tawh Halep chuan, "Tunah kum 32 mi ka ni tawh a, ka tan chuan kum li dang nghah leh chu a rei lutuk dawn. Engtianga hmachhawn tur nge ka hre lo a, a nihna takah chuan ka tennis zinkawng tawpna tur pawh a ni thei ang," a ti.

Kum 2022 US Open-ah khan Halep hian damdawi hman phal loh zinga mi, taksa ti chak thei Roxadustat a hmang niin an hmu chhuak a, hremna pek niin tun thlengin inkhel thei loin a la awm rih a ni.