Bayern tan Muller a rinawm

Mr Bayern Munich ti hiala an sawi ṭhin Thomas Muller chuan German champion Bayern Munich tana a contract neih lai chu kum 2025 thleng a pawtsei.

Kum 34 mi Muller hi Bayern chhul chhuak a ni a, kum 2000 khan Bavarians academy zawmin loan pawhin club dangah a la kal lo.

Bayern tan Muller hian Bundesliga-ah match 454 a khel tawh a, inelna hrang hrangah match 684 khelin goal 237 a khung. Thomas Tuchel-a hote hian zanin dar 1:00 hian Wolfsburg an tlawh dawn a, Bundesliga nomawi chawi nawn turin chak ngei an mamawh.