Arsenal leh City an vannei

Champions League last 16 inkhel tur pawh fel a ni a, English club pahnih Arsenal leh Manchester City te chuan khingpui hautak lutuk lo an hmachhawn thei dawn niin a lang, chutihrualin eng team pawh awlsam taka paltlang theih an ni tawh bik lo ang.

Champion lai Man City chuan Copenhagen an tum dawn - Danish champion hi ngaihnep lutuk chi an ni hran lo, an group stage lamah Manchester United chunga awm thei an ni a, kum 2011 hnua a vawi khat nan UCL last 16 an khel dawn.

Season hmasa khan team paphnih te hi group pakhatah an lo awmdun tawh. Denmark rama an intawnah 0-0 in an inhnehtawk; Etihad Stadium-ah erawh Pep Guardiola naute 5-0 in an chak thung, tun ṭumah pawh hian chak zawk tura rinkai an ni.

Man City leh Arsenal te hi an group awmna ve veah hmahruaitu an nih avangin seeded team an ni a, anmahni khelmualah second leg an khel ang. Gunners hian tunhma lama chak ni hmel an la hmuh lohna Porto khelmual Estadio do Dragao an tlawh hmasak a ngai dawn.

Porto mualah la chak miah lo mah se Arsenal hian a pumpuiah chuan Portuguese club hi vawi thum an hmachhawn tawhah a chungnung zawk an ni vek, inkhel pahnih belhkhawm a nih ṭin avangin Mikel Arteta nauten sulhnu an nei ṭha tihna a ni.

Champion hnem ber, vawi 14 ngawt champion tawh Real Madrid chuan RB Leipzig an tum dawn a, season hmasa pahnihna Inter Milan leh Atletico Madrid te intawng tur hi a hmuhnawm ang. Harry Kane awmna Bayern Munich chuan Lazio an tum thung dawn a ni.