Zanin aṭangin NBA playoff
NBA playoff 2020 match hmasa ber chu zanin dar 11:00 hian Denver Nuggets leh Utah Jazz ten an khel ang. Pathianni khan regular season khelh zawh niin, hmun ruak pakhat inchuhna Play-In Round inkhelah Portland Trail Blazers chuan Memphis Grizzlies 126-122 a hnehin hmun ruak an hnawh khat.
Zanina inkhel tur Nuggets leh Jazz te hi Western Conference lama pathumna leh parukna an ni a, playoff chinah chuan team ṭha vek an nih tawh avangin a hmuhnawm ang - chak zawk tur pawh rin thiam a harsa.
Hripui vangin
Season tira an ruahman dan chuan playoff hi April 18 aṭanga khelh tur kha a ni. Mahse Covid-19 vangin regular season khelh zawh hmain chawlh lailawk a ngai a, hun rei tak chhung chu inkhel thei loin an awm.
NBA Board of Governors chuan kalphung thar duangin playoff khel tur zawnna an siam. Regular season an khelh tawh chin aṭanga chhutin playoff la beisei thei chin team 20 chuan ESPN Wide World of Sports Complex-ah match an neih chhunzawm.
Inelna hi a hmuna entu awm loin khelh a ni a, playoff-ah pawh entu an awm chuang lo ang. Hripui leng karah khel chhunzawm zelin regular season an zo a, tunah chuan conference pakhat aṭangin a thiam zual pariat ve ve an inel chhunzawm ang.
Conference pahnih champion an zawng phawt ang a, chumi hnuah an ngaihhlut leh ropui ber NBA Finals an khel zui leh ang. Playoff chin hi best of seven series hmanga chak zawk zawn ṭhin a nih avangin a ṭha zawk an tlang ṭhin.
A tawpah Blazers
Playoff khel tur hmun ruak hnuhnung ber chu nimin zing khan hnawh khah a ni, Portland Trail Blazers tan Damian Lillard (31 points) leh CJ McCollum (29) ten an team hi Memphis Grizzlies lakah 126-122 in an chakpui.
Portland hian playoff-ah chuan Los Angeles Lakers an hmachhawn leh dawn, Lakers hi hmahruaitu an ni satliah lo; Western Conference lam aṭang chuan inkharkhip hma a tlang thei awmchhun an nih avangin Blazers hmabak hi a hautak dawn.
Blazers coach Terry Stotts chuan, "Tun hnai chawlh kar hnih chhunga kan hnathawh hi a ropuiin ka chhuang takzet a, ka naute hi eng tianga fak tur nge tih pawh ka hrethiam lo zawk hial. Inkar hnai tak takah match kan khel zawn hnem a, chutiang karah pawh chuan kan buai lo.
"Kan hmabak erawh a hautak dawn tih kan chiang vek, chutihrualin inkhelah chuan beisei loh result a thleng ve chawk. Keini chuan nuam ti takin basketball kan khel leh tawp mai dawn a, eng pawh thleng thei a ni," tiin beisei an la neih thu a sawi.
Eastern Conference
Regular Season Table
Seed Team Win-Loss Tlin ni
1 Milwaukee Bucks 56–17 February 23
2 Toronto Raptors 53–19 March 5
3 Boston Celtics 48–24 March 10
4 Indiana Pacers 45–28 June 4
5 Miami Heat 44–29 June 4
6 Philadelphia 76ers 43–30 June 4
7 Brooklyn Nets 35–37 August 7
8 Orlando Magic 33–40 August 7
Playoff Fixtures
Toronto Raptors vs Brooklyn Nets
Boston Celtics vs Philadelphia 76ers
Milwaukee Bucks vs Orlando Magic
Indiana Pacers vs Miami Heat
Western Conference
Regular Season Table
Seed Team Win-Loss Tlin ni
1 Los Angeles Lakers 52–19 March 6
2 Los Angeles Clippers 49–23 June 4
3 Denver Nuggets 46–27 June 4
4 Houston Rockets 44–28 June 4
5 Oklahoma City Thunder 44–28 June 4
6 Utah Jazz 44–28 June 4
7 Dallas Mavericks 43–32 August 2
8 Portland Trail Blazers 35–39 Aug-15
Playoff Fixtures
Denver Nuggets vs Utah Jazz
Los Angeles Lakers vs Portland Trail Blazers
Los Angeles Clippers vs Dallas Mavericks
Houston Rockets vs Oklahoma City Thunder