CAM Cup champion RVL

Cricket Association of Mizoram hnuaia inelna CAM Cup final chu nimin khan khelh niin, tualchhung team ṭha Ramhlun Venglai chuan Kulikawn chu wicket thuma hnehin an champion a, a zawnin hlawhtlinna an chang a ni.

Suaka Cricket Ground, Sihhmuia inkhelah ṭhum vawra vannei zawk Kulikawn lamin vuak hmasak an thlang a, 1st innings-ah hian run 95 chauh siamin an out vek. Remruatdika Ralte leh G. Lalbiakvela ten RVL tan wicket thum ve ve an la. Ramhlun Venglai hian run 163 an siam ve thung, 1st innings-ah Kulikawn lam run siam hi run 68 ngawtin an khum.

2nd innings khelh zui niin, run 68 a hnufual sain Kulikawn ten theihtawp chhuahin Parvez Ahmed (70 runs) leh Sahil Reza (44 runs) te zarah run 180 zet an tlin thei a, 2nd innings an bat ṭhat zarah target atan run 113 an tuk .

Ramhlun Venglai lamin bul an ṭan tha lo, mahse CAM Cricketer of the Year a thlan Joseph Lalthankhuma chuan run 42 rawn siamin wicket keeper Lalhmachhuana’n run 23-in a rawn thlawp ve bawk a, a tawp khartu Remruatdika Ralte a bat ṭha takzet a, run 38 siamin RVL an chak.

Best Batsmen: Sahil Reza, Kulikawn

Best Bowler: Lalramnunsiama, Kulikawn

Man of the Series: C. Lalrempuia, Kulikawn