Nishikori-a'n Covid-19 a kai

Japan tlangval tennis khel thiam Kei Nishikori chuan Covid-19 a kai a, tun thla tawpa khelh tur US Open atan a dinhmun a chiang lo zui nghal - inlan theih ngei erawh a la beisei thung.

Nishikori hi Western & Southern Open khel turin a inruahman a, mahse he tah chuan a inlan thei dawn lo tih a chiang. Tunah hian IMG Academy, Florida-ah khung hran mek niin a taksa lamah erawh natna langsar a nei lo.

Kum 30 mi Nishikori chuan, "Coronavirus ka kai tih hmuh chhuah a ni a, Cincinnati tournament-ah ka inlan thei lo ang. New York pan tura ka inruahman tawhna pawh a thlawn rih, tunah chuan Florida-ah ka awm rih ang," a ti.

US hi hripui hluarna hmun a ni a, nimin tlai thleng khan hri leng vanga thi hi 170,000 chuang an awm tawh - US Open hi August 31 aṭanga khelh tum mah se player langsar tam tak chu an inhnukdawk tawh.