Champions League Semifinal Dai ngai loh ram dai thei PSG leh Leipzig

Paris Saint-Germain leh RB Leipzig ten zanin dar 12:30-ah Champions League semifinal an khel dawn, team pahnih hi UCL final la khel phak ngai lo an nih avangin a chak zawk chuan dai ngai loh ram an lut dawn.

French champion PSG hi chuan tun hmain UCL semifinal an khel tawh, final erawh an la thleng ngai lo. 2016 aṭanga Bundesliga khel ve chauh Leipzig ten erawh an thlen chin apiang hi sulhnu thar a ni zel - season an hman dan chhutin inkhel hmuhnawm a beisei ngam.

Benfica khelmual Estadio da Luz-ah Neymar leh Kylian Mbappe ten an thiam thil an 'show' dawn a, manager ṭhangduang Julian Nagelsmann-a'n a defender hman thiam Dayot Upamecano hoin lo dan chah an tum thung ang.

Arab sum an hman hnuah Paris Saint-Germain an invulh lian zel a, 2017 khan khawvel player manto ber leh a dawt ni turin Neymar leh Kylian Mbappe an lalut - an duh ber chu Champions League nomawi a ni a, kum 25 hnua semifinal an thlen leh avangin beisei pawh an nei sang.

PSG president Nasser Al-Khelaifi chuan, "Ka hlim takzet, club tan chanchin ṭha a ni," tiin Atalanta an hneh hnuah a sawi a, a neitu lam hlimna hi coach leh player chuan tihtawpsak an duh dawn lo. Thlen china lungawi mai loin hmabak an la nei tihna a ni.

French champion hi tlarhma lamah chuan duhthusamin an inrem thei dawn. Neymar-a'n vanglai a hmang a, rawlthar duhawm Mbappe a dam chiang tawh - hrem tuar Angel di Maria a lo kir thei tawh dawn a, striker Mauro Icardi an la nei bawk. Leipzig tana mangchhia thlen thei tur ṭhiau an ni hlawm.

Neymar chauh pawh hi buaipui tham a nih zia chu quarterfinal-ah a lang chiang tawh, inkhel boruak sang leh team lian laka chiai ve ngai lo Mbappe-a'n inkhel bul a ṭan ngei a rinawm, manager Thomas Tuchel tan a ngaihṭhat thlak ang.

Goal venhim kawngah erawh buaina awm thei a ni. Goalkeeper Keylor Navas chu Atalanta an hneh ṭuma a tihrawl hliam a la dam fel lo, nimin tlai thleng kha chuan Costa Rica international hi inkhel lo tura tih a ni; season kal laia match kua chauh la khel Sergio Rico a luh a ngai dawn.

Red Bull hotupa, Austrian billionaire Dietrich Mateschitz-a'n Leipzig-ah hian neitu nihna 49% zet a nei a, a bak la awm pawh company hnathawkte ta a ni hlawm. Club neitu chungchangah German fans tam tak an lungawi lo a, huat rawn ni mah se an kalphung erawh a danglam.

Club ṭhenkhat angin sum tam tak sengin player an lalut ve nghek nghek lem lo a, kum naupang zawk an chher nasa - an manager Nagelsmann pawh kum 33 mi chauh a la ni. UCL semifinal thleng thei manager naupang ber a ni a, final thleng thei naupang ber ni turin vawi khat chak a tawk.

Leipzig hian an striker ṭha ber Timo Werner chu season zawh hmain an chelh thei lo a, an dinhmun san tawk loh zia a chiang. Mahse manager Nagelsmann-a'n a naute a hrechiang a, team ṭha zawk leh tawnhriat ngah zawk Atletico Madrid hnehin an tlang.

Rawlthar rual awmkhawm an ni a, season kal laia an kum chawlhrual pawh 24 chauh a ni - player chhawr rim zingah keeper Peter Gulacsi chiah kum 30 tling a la awm. Pressure nei loa khel tur an ni a, pawisa hmang hnem PSG lakah rinkai lo zawk ni mah se an zam dawn lo.

Quarterfinal an khelh ṭuma mipui mit fukna Upamecano chu player pawimawh a ni leh dawn. Kum 21 mi defender hian tharum a ngah a, striker rorum Diego Costa a dahṭha thei; ball pass a thiam bakah a fing bawk - Neymar leh Mbappe tan pawh awlsam taka paltlang chi a ni lo ang.

    Ngaihnawm

•    Paris Saint-Germain leh Leipzig te an intawn vawi khatna tur a ni a, team pahnih hi a tu zawk zawk pawh chak se Champions League final an luh vawi khatna tur a ni ang.

•    Leipzig an tlang a nih chuan German club zinga final thleng thei pasarihna an ni dawn, PSG an chak a nih erawh chuan AS Monaco (2003-2004) hnu lama French club final thleng leh thei hmasa ber an ni dawn.

•    Paris club hian European football knockout stage-ah German club pathum an hmachhawn tawh, hnehna chang vekin tun season last 16-ah pawh Borussia Dortmund an hneh.

•    PSG hian 1995-95 hnua a vawi khat nan Champions League semifinal an lut leh chiah, semifinal an luh hnuhnung zawkah hian Italian club AC Milan ngam loin an tla.

•    UCL match an khelh hnuhnung 33-ah PSG hian goal an khung vek, final-ah hian goal an khung leh a nih chuan goal khung zawn rei lama record ṭha ber Real Madrid (34 match) an nihrual chiah ang.