Tuchel-a player Nagelsmann

A la rei lo, kum 12 liam ta mai kha a la ni. Thomas Tuchel chu Augsburg reserve team coach a ni a, hetih laia a player enkawl zingah hian Julian Nagelsmann pawh a tel. Tunah chuan Champions League final luh inchuhin an intawng dawn - Nagelsmann hi player ni loin Leipzig coach a ni tawh!

Defender Nagelsmann  hi kum 20 mi chauh a nih laiin a khupah hliam a tuar a, khelmual chhunga inkhelh chak em em mah se hreh tak chungin inkhelh a chawlhsan a ngai ta si; manager ṭhang duang a nihna tura kawng ruatsak a ni tih erawh a hre nghal bik lo.

Augsburg-ah contract a la neih tho avangin Tuchel hian coaching team zinga tel turin a sawm a, kum naupang tak chungin a coaching career a inṭan. Kum 28 mi ni chungin Hoffenheim chu hlawhtling takin a enkawl a, tun season aṭangin Leipzig a enkawl. Bundesliga-ah pathumna an ni a, inelna lian UCL-ah manager ropui Jose Mourinho leh Diego Simeone te a pet chhuak leh tawh - hmabak chu a manager hlui Tuchel a ni.

Nagelsmann chuan, "Tuchel-a player ka ni ṭhin, tunah chuan thil tam tak a in her danglam tawh, amah ang bawkin ka puitling ve tawh," a ti. Kum 46 mi Tuchel a hlau bik lo a, khelmual chhungah a nauten an pu rilru ang an put a rinawm.

Hoffenheim leh Borussia Dortmund an enkawl laiin manager pahnih hi vawi thum an intawng tawh, tawnhriat ngah zawh Tuchel-a'n ṭum hnih hnehna changin vawi khat chu an inhnehtawk thung.

Nagelsmann chuan, "Tuchel hi chuan football khelh dan ṭha tak a duang chhuak thei zel a, tun ṭuma kan intawng tur pawh hi a danglam leh khawp ang. Kan inkhelh tawhnaah ka la chak ve lo, tunah chuan thawnthu hi ziah danglam a hun tawh.

"PSG hi rinkai chu an ni ngei, Angel Di Maria a lo kir tawh dawn a, ani bakah Kylian Mbappe a dam chiang tawh. Final thleng tur chuan tihsual zeuh kan neih a thiang dawn lo," a ti. Atletico an hneh ṭuma an khelh dan angin an khel leh a nih chuan PSG tan chetsual theihna an ni ang.