Vincent Kompany a chawl ta

Manchester City legend Vincent Kompany chuan inkhelh a chawlhsan a, kum 34 mi player hian Belgian club Anderlecht-ah coach hna a chelh chhunzawm ang. 

Kompany chuan inkhelh a chawlhsan thu hi puangin, "Coach ka nihna angin ka hun hi a ṭha thei ang bera hman kan duh a, chu chuan ka hun 100% a mamawh a ni. Chuvang chuan football player ka nihna chu ka chawlhsan ta," tiin a sawi. 

Kum 34 mi Kompany hian May 2019 khan player-manager ni turin an ram club hi a zawm a, mahse Belgian media-ten an tarlan danin co-manager Frank Vercauteren nen an inhmu thiam lo. Kompany leh Vercauteren-te hi an hma thlir a inang lo a, club lama tla tlum zawk City defender hlui hian a ball boot khaiin coach hna chu full-time in a thawk dawn ta a ni. 

Anderlecht hian season hman zawh takah khan Belgian league sang ber Jupiler Pro League-ah pariatna dinhmun an hauh hram a, Kompany hian league match 15 khelin goal khat a khung. Kompany hian a tir lamah player-manager angin hun hmang mah se kum 21 chhunga club-in season bul an ṭan chhiat ber an tawn hnuah a mawhphurhna chu head coach Simon Davies hnenah a hlan pum hlum. 

Mahse, Davies hi Vercauteren nen an inhmu thiam lo a, February khan a chhuak - tunah Vercauteren hi Kompany nen an inhmu thiam lo ve leh a, tunah erawh a tuartu zawk a ni ta. Anderlecht aṭanga a career ṭantu Kompany hian kum 2006 khan Bundesliga club Hamburger zawmin an ram club a chhuahsan a, kum 2008 khan Manchester City a zawm. 

City tan hian 2018-19 season thleng khelin inelna hrang hrangah match 360-a khel a, goal 20-a khungsak. City tan hian Premier League (4), FA Cup (2), League Cup (4) leh FA Community (2)-ah a champion. Premier League Player of the Season (2011-12)-ah thlan a lo ni tawh a, PFA Team of the Year-ah vawi thum a lang thei bawk a ni.