Barcelona coach thar chu Koeman!

Champions League aṭanga tla hlim Barcelona chuan an coach thar ni turin Ronald Koeman an lalut a, Netherlands boss ni lai hian player a nih laia a club enkawl tur hian an ram team enkawl hna chu a kalsan a ni. 

European football transfer-a journalist rin hlawh Fabrizio Romano chuan Barca leh Koeman inrem thu hi social media lamah a puang a, Barcelona hian official taka puanzar la nei lo mah se tun kar chhung ngeia an puan tur thu a sawi bawk - he thuziak i chhiar meuh chuan an puang tawh hial mai thei. 

Barcelona board of directors chu nimin tlaiah khan an ṭhukhawm ngei a, official tak chuan coach Quique Setién banna thu pawh an la puang lo. Mahse, kum 61 mi coach hi club president Josep Maria Bartomeu chuan Spanish radio station COPE hnenah a ban thu a hrilh tawh thung. 

Kum 57 mi Koeman hian player a nih laiin Barcelona tan season ruk a khel hman a, defender nichungin match 264-a inlansakah goal 88 ngawt a khungsak thei a ni. Catalan club tan hian La Liga (4), Copa del Rey (1), Spanish Super Cup (3), European Cup (1) leh European Super Cup (1)-ah te a champion hman. 

Netherlands tan vawi 78 inlana goal 14 khungtu hian inkhelh a chawlhsan hnuah coaching lam luhchilhin Ajax, Benfica, PSV Eindhoven, Valencia, Feyenoord, Southampton leh Everton pawh a lo enkawl tawh. 

Barcelona-ah hian 1998-2000 chhung khan assistant coach a lo ni tawh a, January-a Ernesto Valverde ban a nih pawh khan a club hlui nen hian sawi zawm hman a ni. Mahse, Euro 2020 an hmabak avangin a chhuak thei lo. 

Koeman hian Netherlands tana a contract-ah Catalan club-in an dawr a nih chuan Euro 2020 zawhah a chhuah theih tur thu an ziak tel niin a lo sawi tawh a, mahse Covid-19 vanga Euro 2020 sawn a ngaih tak avangin Euro hmain Barca a pan ta. 

Fabrizio Romano-a'n a tarlan dan chuan Barca hian Tottenham manager hlui Mauricio Pochettino leh an player hlui Xavi pawh an dawr tho a, a tawpah Koeman an ruat ta. Coach a nih hnua Dutch league nomawi vawi thum lo chawi tawh Koeman hian June thla khan Catalunya Radio hnenah, "Barcelona enkawl hi ka duhthusam a ni tih chu mi zawng zawngin an hria a ni," tiin a lo sawi tawh.