A vawi khat nan Police-in MPL final an thleng

Zote Toyota MPL10 semifinal-ah Mizoram Police chuan coach Lalsangzuala Hmar enkawl Chhinga Veng 1-0 in an hneh a, MPL history-a a vawi khat nan Lalbiaksanga Colney hoin final an thleng.

Thawhlehni zan inkhelah hian hun tam zawkah Chhinga Veng chungnung zawk mah se goal an khung thei lo. Chhingcows forward PC Lallawmkima'n an lamah a su lut a, goal dang a lut lo. Police defender Lalrinzuala Khiangte chu man of the match-a thlan a ni.

MPL10 final hi December 22, Zirtawpni zan dar 8:00 hian RG Stadium-ah khelh a ni dawn a, Police hian vawi hnih champion tawh Chanmari FC an hmachhawn ang.

An ṭhat dan berin

Mizoram Police-in sa huai an ser a, an ṭhat dan berin an lut nghalah a ngaih theih. Mizoram defender Lalhmunmawia (Ahmuntea) a dam tawh a, bul rawn ṭanin Laldinpuia nen an inkawp. Dinpuia hi phase 1-ah inlan lo mah se phase 2-ah match nga ngawtah bul a ṭan avangin B. Zoramthanga (B. Sena) aia bul a ṭan hi a mak lo.

Chhinga Veng pawh an ṭhat dan bera an hriatin an khelah a ngaih theih a, midfielder Johny Lalremruata pawh khup hliam chungin bul a ṭan. Santosh Trophy-a Mizoram aiawha zin Ephraim Lalremtluanga leh Suanngaihmuana te bench-ah an awm a, Amuana hi hliam vang niin Ephraim erawh C. Lalhunruata'n phase 2-ah a nek chhuakah a ngaih theih.

Sanga game plan

Mizoram coach Lalsangzuala Hmarin Mizoram Police player-te a hrechiang a, a player enkawl tawh R. Malsawmtluanga leh Malsawmfela te a tir aṭangin a naute a ven uluk tir hle.

Ball siam thiam MS-a chu uluk takin Serchhip tlangval Johny-a'n a veng a, MPL best player vawi hnih ni tawh MS-a dah ṭhatin a awm. Sawmfela pawhin a thiam tih lantir mah se ball hlauhawm a pe chhuak thei lo.

Chhinga Veng an chungnung a, an che rang zawk a, goal chance pawh an insiam. MS Dawngliana ball pass ṭha chu Lallawmsanga'n la lut lo a, pet nghal a thlan avangin keeper F. Lalmuanawma a pass. Johny-a'n Lalruatpuia a bum hnuah cross ṭha nei mah se Dawngtea'n six yard box pawn chiah aṭangin a pet over.

Second half-ah Johny-a'n box pawn aṭangin crossbar a pet per a, LS-a pawhin box pawn aṭangin goal pawnah chauh a pet. Chhinga Veng an khel ṭha zawk a, penalty shout ṭum hnih an nei bawk a, referee-in penalty a pe lo ve ve - Police an vannei. Minute 80-naa goal an chhuah hnuah goal chance an insiam thei lo.

Goal khat a tawk

Mizoram Police hi rinkai zawk an ni a, beisei angin an khel chhuak lo. Chhinga Veng player an che rang si a, game rang tak khelh ve an tum avangin an buai. Winger tlan chak Lalbiakhlua'n ball ṭha a hmu thei lo a, a 'nil' a, captain Lalfakzuala pawh a che thei lo. F. Lallawmkima a thawkrim a, mah se a tlan tamnain rah ṭha a thlen thei meuh lo.

Sawmfela erawhin ball a la thla mawi ṭhin a, hei hi a lansarhna a ni. Box chhungah hun ṭha a nei thei meuh lo a, Chhinga Veng defender FC Lalhmunmawia leh A. Vanlalremruata ten an hna an thawk ṭha hle. Mahse, minute 80-naah Fakzuala'n corner a pet lut a, Hunruata'n a tauh ṭhelh avanga insa seng hman tawh lo PC-a'n an lamah a su lut.

Goal luh hnuah hian Police hi an che ṭha ta zawk a, Sawmfela'n goal dang khung belhna remchang neiin ṭha takin pet mah se FC-a'n a dang hman. Police-in semifinal lut tura an mamawh tawk goal khat an khung a, Ahmuntea leh Lalrinzuala te hoin goal venhim hna an thawh ṭhat avangin 1-0 in an chak.

BS-a a lawm

Inkhelh hmaa sawi hlawh chu coach pahnih Lalsangzuala Hmar leh Lalbiaksanga Colney te inhmachhawn hi a ni a, inkhelh banah Police coach BS-a Colney a hlim zawkah a ṭang. All India Police Meet-a Mizoram Police champion pui tawhtu BS-a'n MPL nomawi chawi theihna hun ṭha a nei ta.

Police coach BS-a Colney chuan, "Kan khel ṭha lo a, mahse kan duh ber kan hlawh chhuak. Final thlen kan tum a, min thlenpuitu ka player-te leh coaching staff te chungah ka lawm hle. Police lama kan hotute pawhin min ṭawiawm ṭha a, champion ngei tumin final kan hmachhawn ang," tiin Vanglaini a hrilh.

Mizoram Police hi MPL1-ah pahnihna ni mah se final a la awm lo a, MPL2-ah palina ni mah se semifinal a awm lo. MPL3 aṭangin semifinal a awm ṭan a, Police hian vawi li semifinal khelh tawhah a vanduai zawkah an ṭang vek. MPL10-ah BS-a hoin a vawi khat nan final an thleng a, nomawi chawi nghal an tum ang.