Aizawl FC-in engtin nge kum 2023 an khar an dawn?

Zanin dar 7:00 hian Aizawl FC-in Inter Kashi an hmachhawn dawn a, kumin chhunga RG Stadium-a I League inkhel hnuhnung ber tur a ni. I League club tharah hian Edmund Lalrindika leh Lalruatthara te an awm a, inkhel en châkawmna a belhchhah.

B. Malsawmzuala kaihhruai Aizawl FC tan inkhel pawimawh bik tiin a sawi theih a, I League club-a head coach hna a chelh hnuhnung ber a nih theih avangin chak a pawimawh hle.

Beiseina chu

Aizawl FC-in RG Stadium-ah team ṭha Gokulam Kerala an chelh a, I League vawi hnih champion tawh Kerala club hian December 19, Thawhlehni khan Sreenidi Deccan chu 4-1 in an sawp.

Gokulam tan AFC laka goak khungtu Alex Sanchez-a'n goal hnih a khung a, Nili leh Sreekuttan ten goal khat ve ve a khung bawk. Kerala club hian match 11-ah point 17 an hmu a, match khata an khel tam zawk chungin Aizawl FC an la pha lo.

Mizo club hian match 10-ah point 18 an hmu a, anmahni aia match khata khel tam Sreenidi chu point khatin an phak lo. AFC hian zanina Inter Kashi an hneh chuan point 21 an hmu ang a, pahnihnaah an invawrh chho thei ang. Mizo club-in I League champion beiseina nei chungin Krismas chawlh nuam takin an hmang thei ang.

AFC ṭha zawk

Gokulam nena an inkhelh zawhah coach Sawmtea chuan, "Tun season-a kan khelh chhiat ber ṭum a ni," tiin a sawi a, Inter Kashi lakah thawhchhuah an tum dawn. Kerala club laka Aizawl FC ṭha zawk an inlan dawn a nih chuan mipui puihna ṭha an mamawh bawk ang.

AFC striker Lalrinzuala'n MPL10-ah goal riat a khung a, top scorer a nih hmel ta hle. Mahse, I League lamah erawh Gokulam striker Alex Sanchez-a'n a rawn khum a, Spanish striker hian goal 10 a khung tawh. Chutihrualin goal kua khungtu Rinzuala hi Indian zinga goal khung tam ber a la ni tho.

Inter Kashi lakah Rinzuala'n goal khung a tum dawn. Aizawl FC tana chanchin lawmawm chu R. Ramdinthara a dam tawh a, Tharpuia leh R. Lalthanmawia ten mual sir aṭangin Rinzuala hi an thlawp a rinawm.

Gokulam lakah midfield an che ṭha tawk lo a; K. Lalrinzela, Sheikh Sahil leh Lalthankhuma ten insiamṭhat an mamawh dawn. An theihna anga an khel a nih chuan Inter Kashi lakah harsa loin point thum an hmu thei ang. Chutihrualin tlarhnung lamin goal an venhim a ṭul dawn a, Gokulam laka inhliam captain Lalchhawnkima dinhmun a la chiang lo.

Inter Kashi hi...

Table thlir chuan Inter Kashi hi Aizawl FC hnuaiah an awm a, Mizo club hi point liin an hmu tam zawk. Kumin June 29-a din chauh Inter Kashi hi Varanasi, Uttar Pradesh a nih miau avangin Aizawl FC angin khawtual player an nei ṭha lo.

Mahse, sum an ngah avangin team ṭha tak an din. Spanish coach Carlos Santamarina-a'n a ho a, assistant coach-ah pawh Spanish coach Javier Broch bakah Indian football-a sulhnu nei ṭha Arata Izumi te an awm.

English defender Peter Hartley chu an player lakluh hmasak ber a ni a, Sunderland academy chhuak Hartley hi hrem vangin a inlan thei dawn lo. Mahse, Spanish pathum Mario Barco, Jordan Lamela leh Julen Pérez te an la awm a, Aizawl FC aiin foreigner an la ngah zawk.

Inter Kashi hian Aizawl an rawn pan hmain RG Stadium-a Mizo club sawptu Delhi FC 2-0 in an hneh a, inrintawkna nen Aizawl FC an hmachhawn ang.