Newcastle hnehin Chelsea an tlang

Chelsea chuan hun tawp dawna Mykhailo Mudryk-a goal khung hmangin an si phurh an sut a, penalty hmanga chak zawk zawnnaah Newcastle United chu 4-2 a hneh zuiin Carabao Cup semifinal an inhlangkai.

Thawhlehni zan quarterfinal inkhel dangah Premier League club pahnih intawngin, Everton leh Fulham te hun pangngaiah 1-1 in an inhnehtawk. Penalty hmanga tlang tur zawn niin, mikhual Fulham hi 7-6 in an vannei ta zawk.

Michael Carrick enkawl Middlesbrough an la kal zel. Championship club hian an khingpui League 1 club Port Vale chu 3-0 in an hneh a, kum 2004 hnua a vawi khat nan League Cup semifinal an lut, semifinal an luh hnuhnung ber hian an champion.

Carrick chuan, "Goal kan nei hma a, chutihrualin goal thum kan neih hnuah pawh khan ka thla a muang chuang lo. A tawp dawn lam minute 15 velah khan thla a muang ve chauh," a ti. Boro hi Championship lamah chuan 13-na an ni mek.

Tihsual hmasa

Stamford Bridge-a inkhelah Chelsea an hmuhnawm a, captain armband hrengtu Conor Gallagher-a'n box pawn aṭangin cool takin goal kila khung a tum a, mahse goal bar a per hlauh - tlemin hniam hret se la chuan Magpies goalkeeper Martin Dubravka tan dan ngaihna a awm lo ang.

Midfielder man tam Moises Caicedo-a'n a dan phak tura ngaih ball a dang phak lo chiah a, defender Benoit Badiashile tan harsa vak loa lo chinfel theih niin lang mah se France international hian a pe sual zui a, minute 16-naah Callum Wilson-a'n goal a khung theih phah.

Blues lamin thapui thawh let mah se Newcastle an ṭang thei hle, tawnhriat nei ṭha Raheem Sterling-a'n ṭha zeta a shot chu keeper Dubravka chuan a lo dansak a, hun tawp dawn thlengin mikhual team an ṭang thei.

Tihsual hnuhnung

Minute 90 an khel tling a, hun pek belh an khel. Mual sir aṭanga ball an cross luh chu Kieran Trippier-a'n a chhut sual, ball sawt kang chu keeper tan tauh tlak a tum a, mahse a ball tauh hi a nat tawk loh avangin Mudryk tana khung nuam tawk chiahin a siamsak.

England international Trippier hian penalty a hlah zui bawk a, ani bakah hian Matt Ritche chuan a hlah. Wilson leh Bruno Guimaraes ten khung mah se, Chelsea tana pettu Cole Palmer, Conor Gallagher, Christopher Nkunku leh Mudryk ten an khung vek avangin Blues an chungnung.

Mauricio Pochettino enkawl Blues tan an chak hi a lawmawm a, chumi piah lamah beiseina sang tak nena an lakluh Nkunku a inlan thei kha an lawmna belhchhahtu a ni ang a, kar tawp Premier League lamah pawh beisei an neih san phah dawn.

Fulham vannei

Tun hnaiah Everton an khel ṭha ṭhin a, an mikhual Fulham lakah pawh rinkai zawk an ni. Mahse, defender Michael Keane-a'n anmahni lama a tih luh palh chu hun tawp dawn lamah Gomes Betuncal hmangin an sut a, penalty-ah an vanduai zui ta bawk a ni.

Tun hma lama Everton enkawl tawhtu, tuna Fulham manager ni mek Marco Silva chuan, "Thil tum pakhat kan nei a, kan thil tum chu harsa tak chungin kan ti hlawhtling thei hram. Penalty hnuhnung ber pet a nih thleng khan rilru a thlamuang lo," tiin a awlsam loh thu a sawi.

Sean Dyche leh a naute erawh Premier League point 10 an paihsak hnuah a zawnin vawi li chak thei mah se, tunah erawh a beisei ang result an nei thei lo. Kum 1995 daih tawha FA Cup an lak bak kha chu nomawi an la chawi leh thei rih lo.