Earps a langsar

England hmeichhe team goalkeeper Mary Earps chuan BBC Sports Personality of the Year 2023 award a dawng a, a kum zawnin hmeichhe footballer-in he lawmman hi an dawng tihna a ni - nikum khan England forward Beth Mead chuan a lo dawng tawh.

Kum 1954 aṭanga sem ṭan chawimawina dawng thei tur hi expert-ten an thlan hming an chhawp chhuak a, heta ṭang hian mipui vote hmangin award dawng tur thlan ṭhin a ni - Earps chuan vote a hmu sang ber.

England cricketer Stuart Broad chu pahnihna niin, world heptathlon champion Katarina Johnson-Thompson chu pathumna a ni a, jockey Frankie Dettori, wheelchair tennis player Alfie Hewett leh golfer Rory McIlroy te chu award dawng thei tura chhawpchhuah zingah an tel bawk.

Manchester United tana khel Earps hian hmeichhe World Cup 2023-ah khan England chu final hruai thlengin, match sarih an khelha minute zawng zawng a khel kim vek a, goal li chiah chhuahin, final-ah penalty hial dang mah se, Spain lakah 1-0 in an tlawm thung - Earps hi goalkeeper ṭha berah thlan niin Golden Glove a dawng.

Euro 2022-ah England chu champion nomawi chawipuiin, England hmeichhe team-in major trophy an hlawhchhuah hmasak ber a ni.

Season hmasa khan England Women's Player of the Year atan thlan niin, Women's Super League-a vawi 50 clean sheet nei thei hmasa ber keeper hi Ballon d'Or-ah pangana a ni bawk.

Treble champion Manchester City tan hawn tur a awm nual bawk - Pep Guardiola chu Coach of the Year atan thlan a ni a, City chu Team of the Year an ni bawk. Manchester khaw club-in Champions League, Premier League leh FA Cup an champion theih nana match 53-a goal 52 khungtu Erling Haaland chu World Sport Star of the Year a ni a, Liverpool legend Sir Kenny Dalglish-a hnenah Lifetime Achievement award hlan a ni bawk.