City hmaah la chawi ngai loh Club World Cup

Manchester City-in an club chanchina a vawi khat nan Club World Cup an khel a, a vawi khat nana nomawi chawi thei dinhmunah an ding mek - vawi khat chak chiah an mamawh tawh.

Thawhlehni zan khan CWC semifinal-ah City hian 3-0 in Asian champion Urawa Red Diamonds chu an hneh a, Japanese club defender Marius Hoibraten chuan an lamah tilutin, Mateo Kovacic leh Bernardo Silva ten goal khat ve ve an khung bawk.

Brazilian club Fluminense chuan Thawhṭanni zan khan semifinal inkhel hmasa zawkah 2-0 in African champion Al Ahly an lo hneh tawh a, Zirtawpni zan dar 11:30-ah City nen hian champion inchuhin final an khel ang.

Zirtawpni zanah vek hian pathumna inchuh inkhel a awm dawn bawk a, zan dar 8:00-ah Urawa Reds leh Al Ahly te an intawng ang.

A sen thei lo!

J League club Urawa Red-in City goal nawr buan buan chu an tan thil âtthlak a ni tih hriain, uluk takin tlarhnung lam an veng a, ṭan pawh an ṭang thei hle - mahse, first half hun pek belhah an chesual a, Matheus Nunes-a cross aṭanga ball kal chu Norwegian defender Hoibraten chuan an lamah a tilut.

Goal dang lut loin chawlhlawk hman zui a ni a, team pahnih 'quality' enin, chak tur a chiang tiin a sawi theih. Minute 52-na a ni a, City bawk kan hmu. Urawa Reds tlarhnung awl lai takah Kyle Walker-a'n ball thlawh lutin, Kovacic chuan goal-ah a chantir.

Minute sarih a liam a, City bawkin goal an khung nawn. Japanese club goalkeeper Shusaku Nishikawa chuan Nunes-a 'shot' chu dang zet mah se, a let lehlam chu Bernardo Silva-a'n goal-ah a chantir zui a, minute 60 a thlen hmain chak tur a chiang tawh.

City hi an vanneih zan ni se, hei aia tam zawka chak thei an ni hial. Mahse, Nunes, Jack Grealish, Oscar Bobb leh Julian Alvarez ten an chance neih an chhawr lo vek a, 3-0 a an lungawi a ṭul.

A hlu asin

City boss Pep Guardiola chuan, "Kan tana he inelna pawimawhzia hi ka player-ten an hria. He inelnaa final thleng tur hian thil ropui tak tihhmasak a ngai a, chu chu Champions League nomawi chawi a ni.

"Chuvang chuan tun season-a final kan khelh hi kan dam chhung zawnga Club World Cup final kan khelh awmchhun pawh a ni mai thei. Kan nomawi la chawi ngai loh hi chawi ngei a, kan hmabak hlen fel kan tum ang," a ti a, City tana Club World Cup nomawi chawi a duh.

English club zingah Club World Cup-a champion hi club pathum an lo awm tawh a, Manchester United, Liverpool leh Chelsea an ni - a palina ni turin City-in hun ṭha an nei a, mahse, an hmachhawn tur Fluminense hi Brazilian player ṭha rual awmna an ni a, a awlsam lo ang.

Spanish manager Pep hian CWC hi vawi thum a lo chawi tawh. Barcelona chu 2009 leh 2011 khan nomawi a chawipui a, Bayern Munich chu kum 2013 khan a lo champion pui tawh bawk.