Atletico an chak zo lo

Spanish La Liga-ah Thawhlehni zan khan Atletico Madrid an inlan a, champion tum Diego Simeone naute hian point hnih an hloh - an mikhual Getafe nen 3-3 in an inhnehtawk a, point khata lungawi an zir a ṭul.

Atletico defender Stefan Savic chu minute 38-na lekah a yellow card pahnihna a hmuh avangin hnawhchhuah a ni a, mahse, Atletico an ṭang thei viau - 3-1 ngawtin hma an hruai hman hial a, player 10-a khel zawk na na na erawh ṭan rei a harsa.

Antoine Griezmann chuan minute 44-naah Atletico tan goal hmahruai a khung a, Getafe-in Borja Mayoral hmangin an sut - hemi hnuah hian Atletico hian Alvaro Morata leh Griezmann (penalty) hmangin an khung leh a, 3-1 a ni.

French striker Griezmann hian club legend Luis Aragones record nih rualin, Atletico tana goal khung hnem ber a ni nghal a, goal 173 zet Spanish club tan hian a khung ve ta - Spain coach pawh lo ni tawh Aragones-a record hi tun season-ah a khum ngei dawn niin a lang.

Mahse, Griezmann leh Atletico hlim chhung erawh a rei lo. Oscar Rodriguez chuan minute 87-naah Getafe tan si phurh a sut ṭhen a, hun pek belh minute thumnaah Mayoral chuan penalty hmang thoin si phurh sut zawhna goal a khung zui.

Nizan khan Barcelona chuan Almeria mikhualin, an result kan hre hman lo a, league hmahruaitu Girona chuan zanin dar 11:30-ah Real Betis an lenchilh ang a, Real Madrid chu zan dar 2:00-ah Alaves nen an inkhel dawn bawk.

Atletico manager Simeone chuan, "Ni thum danah match kan nei reng a, minute tam tak khelh tur a la awm laiin player pakhatin kan kiam bawk. Chuti chung chuan kan nauten an theihna zawng zawng an hlan a, game harsa tak a ni e," tiin inkhel a thlirlet.