Copa America khel lo tur Neymar

Neymar chuan Copa America 2024 a khel thei dawn lo - Brazilian forward hi khup hliam vangin a chawl mek a, an ram tan inelna lian a khelh theih loh tur thu hi Brazilian team doctor Rodrigo Lasmar chuan a sawi chiang.

Ocotober 17 khan Neymar hian Brazil tan World Cup qualifying a khel a, world champion hmasa ber Uruguay nen an inhmachhawn ṭumin a khup vei lam hi a hliam, chawlhkar hnih hnuah zai niin a lo kir hun tur hi sawi theih a la ni lo.

Copa America 2024 hi United States chuan an thleng dawn a, inelna hi June 20 aṭanga khelh tur niin July 14 thleng a awh ang - thla ruk vel inbuatsaihna hun a la awm tihna a ni a, thil tam tak a la thleng thei dawn.

Brazilian team doctor Rodrigo Lasmar chuan, "Copa America khelh chu Neymar tan a la hma lutuk ang, a hliam leh a dam hun tur chhutin a tan inkhelh luih chi a ni dawn lo, dawhthei taka kan nghah a ngai dawn a ni, a rei lo berah thla kua tal nghah a ngai dawn," a ti.

Kum 31 mi Neymar hian Brazil tan match 129 a khelh aṭangin goal 79 a khung tawh a, world champion vawi nga ni tawh Brazil tana goal khung hnem ber a ni mek, legend Pele (77 goals) meuh pawh a khum.

Brazil hi Group D-ah Colombia leh Paraguay te nen an awmkhawm a, playoff aṭangin Costa Rica leh Honduras te inkhela chak zawkin an la belhchhah bawk ang.