Djokovic leh Sabalenka tan chawimawina

Novak Djokovic leh Aryna Sabalenka te chu International Tennis Federation’s 2023 ITF World Champion atan puan an ni, he chawimawina dawng tur hian singles player tan Grand Slam paliah a hniam berah semifinal tal an thlen vek a ngai.

Serbian star Djokovic hian Australian Open, French Open leh US Open nomawi a chawi a, grass court inelna lian Wimbledon final a lut bawk a, nomawi inchuhna inkhelah Carlos Alcaraz a ngam lo thung - a tan season duhawm bik a ni tho.

World number 1 ni chungin kum tawp a hmang dawn a, number 1 ni chunga kum tawp a hman vawi riatna niin record thar a ni. Tun season chhungin match 56 zetah hnehna changin vawi sarih chauh chak loh a nei.

Hmeichhe player Sabalenka tan pawh season duhawm a ni. Grand Slam hmasa ber Australian Open-ah a champion a, hard court inelna lian US Open-ah final lutin, a dang pahnih French Open leh Wimbledon-ah pawh semifinal a thleng phak hial.